Parlemantera katalan Laura Castel dîyar kerd ke çîyê ke Rojava de qewimîyenê sûcê însanîyetî yê û vat: “Hetê hukmatê demkî ra ke muzakere yeno redkerdene, bombardumankerdişê herêmanê kurdan parçeyêkê stratejîyê sabotekerdişê prosesî yo.”
Parlemantera katalane Laura Castel derheqê hêrişanê vera Rojava de Rojnameger Huseyîn Elmaliyî reyde qisey kerd û erjnayîşê xo kerdî.
Castele çîyê ke Kobanî de qewimîyenê sey “wehşet” bi name kerdê û vat: “Ma vînenê ke Tirkîya bi drone û çekanê giranan piştî dana nê mîlîsanê wehşîyan. Nê çekî ewro vera şarê kurdî şuxulîyenê.”
Castele ke venga komelê mîyanneteweyî da wina vat: “Ma wazenê derheqê nê heme wehşetan de cigêrayîşêko mîyanneteweyî yo bêhet bêro kerdene û rolê rayedaranê Tirkîya zî mîyan de bibo.”
Castele ke îdareyê demkî yê Sûrîye rê vengdayîşê muzakere kerd, bale ant ke ganî heqê şarê kurdî binê garantîya qanûnî de bêrê destgirewtene û vat: “Ganî îdareyê demkî yê Sûrîye reyna masaya muzakere ser ronişo û heqanê şarê kurdî nas bikero.”
Castele ke bale ant xoverdayîşê cinîyanê kurdan ê Rojava ser o, vat: “Xoverdayîşê cinîyanê kurdan şorişêko raştikên o. Mesajê mi zelal o: Xoverdayîşî dewam bikerê Rojava azad beno.”
