Hesabê medyaya dîjîtale yê 32 sazgehanê medyaya kurdî ke derheqê hêrişanê HTŞ’î yê vera Rojava de xeberî vila kerdî, ameyê astengkerdene. Bi pêroyî 39 hesabî ameyî astengkerdene. Sazgehê medya ke ameyê astengkerdene bi temamî 640 hezar taqîbkerdoxê xo est ê û postê înan 232 mîlyon reyî ameyî temaşekerdene.
Vera çapemenîya kurdî hêrişêko eşkera
Dewleta tirkan hewl dana ke hêriş û xoverdayîşê Rojava hetê raya pêroyî ya dinya ranêra vînayene. Badê ke çeteyanê HTŞ’yî dest bi hêrişan kerd, verê ci kesanî ke nê hêrişî raya pêroyî ya dinya reyde vila kerdêne, rojnamegerê kurdî bîyî. La seba qelsbîyayîşê nê hêzê medyaya kurdî, hêrîşêko eşkera est o vera çapemenîya kurdî. Medyaya kurdî ya Tirkîya û Vakurê Kurdîstanî ke hediseyan taqîb kena, binê sansurêko giran de ya.
39 hesabî ameyî astengkerdene
39 hesabanê medyaya dîjîtale ra 23î ci yê rojnamegeran ê û 16î ci yê ajans, rojname û kanalanê televîzyonî yê. 36 hesabî yê Xî, 2î ci yê Înstagramî û yewî zî hesabê YouTubeyî yo. Rojnameger Amed Dîcle, Dîlan Babat, Medîne Mamedoglu, Nedîm Turfent, Ruşen Takva û Sînan Tunçdemîrî mîyanê rojnamegeran de yê ke hesabê înan ameyî astengkerdene.
Ajansê Mezopotamya, Ajansê Welatî, ETHA, Jîn News û Rojnameyê Yenî Yaşam mîyanê ajans, rojname û kanalanê televîzyonî de yê ke hesabê înan ameyî astengkerdene.
