Parlamentera DEM Partî Newroz Uysal Aslan îfade kerd ke Şêxmeqsûd û Eşrefîye de peymanê huqûqî yê mîyandewletî ameyê binpaykerdene û vera huqûq û peymanan sucê şerî ame kerdene û vat ke ganî sazgehê mîyandewletî zî sucdaran ra hesab biwazê.
Çeteyê HTŞ û SMO’yî hêrişanê vera taxanê Şêxmeqsûd û Eşrefîye de cinî, gede û welatijê sivîlî kiştê û sucê şerî kerd. Riyê hêrişanê bêserûber û hovane bi seyan welatijî zî birîndar bîyê. Sewbîna xeylê welatijî zî hetê çeteyan ra ameyê remnayene. Yeno vatene ke 120 hezar welatijî taxan ra koçber bîyê. Keyeyê welatijanê taxan zî encamê hêrişan de rijîyayê û xeylê welatijî binê xirbeyan de mendê.
Yeno vatene ke welatijê vîndî bîyê û aqubetê înan nêyeno zanayene. Rêxistinê heqanê merdiman ê Sûrîye û Rayberîya Xosere seba nê kerdişanê sucê şer û binpaykerdişê heqanê merdiman ke ameyê kerdene, sucdarî bêrê muhakemekerdene vengda sazgehanê mîyandewletî yê huqûqî. La rixmê vîdeoyanê ke vejeyê orte zî sazgehê merdiman û huqûqî yê mîyandewletî heta nika bêveng ê û cipersayîşêk nêdayo dest pêkerdene.
Parlamentera Partîya Têduştî û Demokrasî ya Şaran (DEM Partî) a Şirnexî Newroz Uysal Aslan derheqê sucê şerî ke ame kerdene û bêvengîya sazgehanê mîyandewletî ajansê ma rê qisey kerd.
‘Şêxmeqsûd û Eşrefîye de kerdişê vera merdimîye qewimîyayê’
Newroz Uysal Aslan dîyar kerd ke hêrişan de xeylê kerdişê sucê şerî yanê sucê vera merdimîye qewimîyayê û wina vat: “Taxê Şêxmeqsûd û Eşrefîye ke binê dorpêçî de bîyê destpêkê serrî ra heta nika binê hêrişî de bîyê. Hêrişan de çekê giran ameyê şuxulnayene. Goreyê huqûqê mîyanneteweyî hêzê asayîşî û welatijê sîvîlî şer de nêyenê hedefgirewtene. Ca û mekanê îbadetî, nêweşxane û qadê cuye ke lazimtîyê şarî tede yenê vînayene, nêyenê hedefgirewtene. Goreyê peymana mîyanneteweyî zî nê sucê şerî yê û eynê wextî de sucê vera merdimîye yê. Mîyanê hêrişkaran de zî tena hêzê k sey hêzê hukmatê Şamî yenê pênasekerdene eynê wextî de grûbê çete yî ke vera komelî hêriş kerdbî, înan zî ca girewtêne. Welatijî rasterast hedef ameyê girewtene û sucêkê merdimîye ame kerdene. Hêrişê vera welatijan yanî taxan sucêko gird o. Waştêne ke kurdan koçber bikerê û herinda înan de kesanê bînan bîyarê uca de bi ca bikerê. Goreyê peymananê huqûqî yê mîyandewletî zî no hedefgirewtişê nufuşî vera netew yan zî bawerîyan o û sucê vera merdimîye yo.”
‘Her kes vera sûcê şerî bêveng mend’
Newroz Uysal Aslan bale ant bêvengîya sazgehanê huqûqî yê mîyandewletî û wina qisey kerd: “Vera welatijan bi eşkerayî sucê şerî ame kerdene. O ke tewr zaf bala merdimî antêne û ame parekerdiş zî cenazeyê cinîyêka şervan ke awanî ra ameye eştene bîye. Vera cenazeyê aye bêhurmetî ameye kerdene. Mîyanê hewteyêk de kerdişê her di taxan heme sucê şer bîyê. Pers no yo; gelo kam hesabê nê sucan biperso? Nê sucî heme dîyar ê. Ameyê belgekerdene û vîdeoyê înan zî heme ca de ameyê parekerdene. La rixmê ney zî reyna sazgehê huqûqî yê mîyandewletî bêveng mendê. Demêko derg o ke krîzê huqûqê mîyandewletî est o. La kesanê ke uca de hêriş kerd û paştî daye û bêveng mendê zî do bêrê belgekerdene û rojêk hesabê ci bêro persayene.”
‘Hem ti vajê proses hem zî hêriş bikerê, no nêbeno’
Newroz Uysal Aslan dîyar kerd ke tehdîtê Tirkîya yê vera Vakur û Rojhelatê Sûrîye prosesê Aştî û Komelê Demokratîk ke vakurê Kurdîstna û Tirkîya de dewam keno, xetimnenê û nê çîyî vatî: “Eke şima erdêk de vajê ma û kurdî waûbirayê yewbînan ê û prosesêk dest pêbikero û heto bîn ra îradeyê şarê kurdî çin bihesibnê û rasterast hêriiş bikerê, o wext nêzdîbîyayîşê to yê nê prosesî do bêro persayene. Mîyanê şarî de bêbawerî zî awan bena. Hem Rayberê Şarê Kurdî Abdullah Ocalan û hem zî Têgêrayîşê Azadîye bi gamanê pozîtîf prosesî rayra beno la dewleta Tirkîya hema zî gamî nêeştê. Dewleta Tirkîya hetêk ra prosesî rayra bena û hetêk ra zî dişmenîya kurdan kena. No tezad o. No ne goreyê ruhê prosesî yo û ne zî goreyê pawitişanê şarê kurdî yo. Şarê kurd qadan de vera nê reaksîyon mojna. Ê ke prosesî sabote kenê ma nîyê, vinderetişê dewlete yo. Eke prosesêk est bo ganî her kes goreyê ruhê prosesî têbigêro.”
