Komîteya Têkilîyanê Teberî ya KCK’yî, hêrişê vera Şêxmeqsûdî ser o nêrazîbîyayîşê xo mojna û da zanayene ke “sûcê şerî” yeno kerdene.
Komîteya Têkilîyanê Teberî ya KCK’yî, derheqê hêrişê ke Heleb de vera kurdan yenê kerdene de eşkerayîyêka newîye daye. Eşkerayîya ke ame vatene ke Heleb de sûcê şerî yeno kerdene.
Eşkerayîya KCK’yî wina ya:
“Rejîmê Sûrîye, çeteyanê girêdayeyê Dewleta Tirkan reyde pîya û bi tewrbîyayîşê aktîfî yê Dewleta Tirkan, Heleb de verê çimanê dinya de kurdan ser o akerde qirkerdişêk pê ano. Sîvîlî, extîyarî, cinî û domanî yenê qirkerdene. Armancê nê hêrişan koçdayîşê kurdan û vurnayîşê demografîye yo. Rejîmê Sûrîye û komê çeteyan ê ke raşte raşt Dewleta Tirkan kordîne kena; nêweşxaneyî zî tede cayanê sîvîlan hedef genê û bi çekanê qedexeyan bombarduman kenê û bi na hawa akerde sûcê şerî kenê.
Rejîmê Sûrîye û Dewleta Tirkan, seba hêrişanê xo yê hoviyan ê ke pîya rayra benê, sey baxane bi vatişê ‘Hêzê girêdayeyê PKK’yî Heleb de yê û şer kenê’ propaganda kenê. Ma wazenê bidê zanayene ke bi nê propagandayê nêraste wazenê raya pêroyî bixapînê û seba qirkerdişê ke kenê, baxane virazê. Wezîrê Karanê Teberî yê Tirkîya Hakan Fidan û Wezîrê Pawitişî Yaşar Guler, bi propagandaya zûran hem zemînê şerî amade kerdê hem zî şerî raşte raşt îdare kenê. Hêzanê Sûrîyeya Demokratîkan çend ray eşkera kerd ke hêzê girêdayeyê PKK’yî qet Heleb de çîn ê, la Hakan Fîdan û rejîmê Şamî propagandayê nêraştî de israr kenê. Israrê Hakan Fîdan û Yaşar Gulerî, planê sabotekerdişê Prosesê Aştîye û Komelê Demokratîkî yo ke Rayber APOyî seba tesîskerdişê birayîya kurd-tirkî û çareserîya demokratîke ya meseleya kurdan awan kerd, serê Sûrîye ra yo. Dewleta Tirkan, sey hetê kordînekerdişê şerî, dişmenîya kurdan Heleb de ramena.
Vera kurdanê ke Heleb de DAIŞ bin kewt, hêrişkerdişê bi planê neweyî yê hemkarî yê rejîmê Sûrîye û Dewleta Tirkan, hêrişê DAIŞ’î yê diyîn o. O wext zî DAIŞ’î waştêne ke Heleb de kurdan qir bikero û koç bikero, nika zî bi baxaneyanê cîya-cîyayan hêrişê vera taxanê Şêxmeqsûd û Eşrefîye heman armancî tey darêno. Coka ganî merdim nê hêrişan sey dewamê hêrişanê cîhadîstan ê DAIŞ’î bivîno û bira Meclîsê Şarê Helebî sey îradeyê xoverdayîşê vera DAIŞ’î bivîno. Kurdan, vera DAIŞ û her tewir komê çeteyanê cîhadîstan 15 serrî yo bi dayîşê bedelanê pîlan xover dayo. Na xoverdayîşê kurdan, seba merdimîye destkewteyêko pîl o. Ganî raya pêroyî ya dinya wina bizano, fam bikero û goreyê naye şarê Helebî reyde paştî bigêro; no seba xeripnayîşê planê lêminî yê serê Helebî û kerdîşê mesulîyetan wezîfeyêko exlaqî-wîjdanî yo.
Vakur, Başûr, Mexmûr, Şengal, Ewropa zî tede paştdayîş û têhetbiyayîşê pêro şarê Kurdîstanî hêjayê teqdîrî yo. Ma sey Têgêrayîşê Azadîye, xoverdayîşê qehremankî yê şarê xo yê vera hêrişanê koçdayîşê bi zorî û qirkerdişî yê ke Heleb de kurdan ser o yenê kerdene, selam kenê. Ma bawer kenê ke pêro kurdîstanijî benê yew laş û her asayî de paştdayîşê xo dewam kenê û seba serkewtişê xoverdayîşê rûmetênî yê Helebî têkoşînî berz kenê.
Vengdayîşê ma no yo ke; vera nê xoverdayîşê kurdan ê vera qirkerdişî de, sere de NY (Neteweyê Yewbîyayeyî), YE (Yewîya Ewropa) wa pêro merdimîye wayîr vejîyo. Eke nê, bêvengîya hêzanê mîyanneteweyîyan tesdîqkerdişê qirkerdişî yo. Vindarnayîşê na hovîtîya ke qet yew huqûqê mîyanneteweyî û qaydeyanê şerî nas nêkena, mesulîyetê pêro dormeyanê sîyasîyan o. Sûrîye de hewcedarîya şaran bi şerî nê, bi haştîye; bi dişmenîye nê, bi birayîye û bi pîya-afernayîşê Sûrîyeyêka newîya demokratîke est a. Kaykerdişê rolî yê pêro hêz û dormeyanê sîyasîyan ê na çarçawe de, do xizmetê aştîya herême bikero.”
