Senatoro Amerîkajij ê Partîya Komareperwer Lîndsey Grahamî dîyar kerd ke Îran hêrişanê vera çalakîkeran bidomna do Serekdewletê Amerîkayî Donald Trump qerarê suîqastî seba Serekê Dînî yê Îranî Elî Xamaneyî bido. Sersefîrxaneyê Sanal ê Îranî yê DYA’yî zî bi eşkerayîyêk dîyar kerd ke Îran hêrişê nêweşxaneyan keno.
Çalakîyê şaranê Îranî ke bi munasebetê krîzê aborî û waştişê azadîye dayê destpêkerdene, roja 11. de yê. Çalakî her ke şono pêroyê Îranî de vila benê. Hêrişê rejîmê Îranî yê vera çalakîyan zî dewam kenê. Vera hêrişanê Îranî yê şarî ser o reaksîyonê teberî zî vêşî benê. Senatoro Amerîkajij yê Partîya Komareperwere Lîndsey Grahamî derheqê çalakîyan de hesabê xo yê X’î ser o parekerdişêk kerd.
Parekerdişî de Grahamî bale anceno çalakîyanê şarî û hêrişanê Îranî yê vera çalakîkeran. Parekerdişî de wina ame vatene: “Êdî ganî merdimê xirabî bizanê ke demo ke Serek Trumpî çîyêk vat do raşta zî bîyaro ca. Goreyê mi Ayetullah û merdimê ey merdimê tewr xirab ê. Ê Nazî yê oldar ê û şarê xo terorîze kenê. Bêyî ferq û cîyayîye şarê Îranî cuyêka başêr wazeno la ê înan kişenê. Bi desan serrî yo Îran terorîzmo tewr gird ê dewlete ramneno.”
‘Îranî rê hetkarî yena’
Grahîmî roportajê xo yê Fox Newsî de bale ant girdbîyayîşê çalakîyan ser o û wina vat: “Ganî şarê Îranî bizano ke ma paştî danê înan.” Grahamî vengda Elî Hamaneyî û wina vat: “Ganî şima bizanê ke eke şima şaro ke cuyêka başêr wazeno û seba ney vejîyayo kuçeyan, ê bikişê, Donald Trump zî do şima bikişo. Îran de bedilîyayîş yeno kerdene. No bedilîyayîş do şaran rejîmê Nazî ra bixelesno û bibo bedilîyayîşo tewr pîl ê Rojhelatê Mîyanênî. Îranî rê hetkarî yena.”
Rejîmî hêrişê nêweşxaneyêko bîn kerd
Balyozxaneyê Sanal ê Îranî yê DYA’yî derheqê averşîyayîşan de hesabê xo yê fermî yê X’î de eşkerayîyêk daye. Eşkerayî de ame dîyarkerdene ke rejîmê Îranî hêrişanê xo yê hemverê sîvîl û cayanê mendişî domneno. Eşkerayî de nê agahîyî ameyê dayene: “Dimayê hêrişê vera nêweşxaneyê Îlamî, nika zî Tehran de nêweşxaneyêk rastê hêrişî ame. Hêrişanê hemverê nêweşxaneyê ke wezîfeyê înan o yewin dermankerdiş o, hovitî, bêrêzî û bêrûmetîya rejîmê Komara Îranî yê hemverê şar û heqan mojneno. Ganî cayê weşîye hedef nêrê girewtene. Dewletê Yewbîyayeyî yê Amerîkayî nê hêrişan şermezar kena û vengdan rejîmê Îranî ke nê hêrişan vindarno.”
