Platformê Cinîyan ê Dêrsimî vizêrî seba Gulîstan Doku rayîrşîyayîş viraşt û eşkerayîyêk daye. Eşkerayî ra dima pîyê Gulîstan Doku Halît Doku vat vîndîbîyayena kêna ey de bêçika lajê walîyê Dêrsimî ê demî û Zaynal Abarakovî est a.
Platformê Cinîyan ê Dêrsimî vizêrî şand seba Gulîstan Doku rayîrşîyayîş kerd û eşkerayîyêk daye. Cinî Kuçeyê Hunerî de ameyî pêser û heta serê çarşîyê binêerdî rayra şîyê. Nameyê Platformê Cinîyan ser o Handan Kahraman, Wekîla Dêrsimî Ayten Kordu, may, pî û waya Gulîstan qisey kerd.
Eşkerayîye ra dima Pîyê Gulîstan Doku Halît Doku qiseykerdişê xo de behsê yew nameyî kerd ke, kesî heta nika behsê ey nameyî nêkerdbi û dosyaya Gulîstan Doku de zî no name nêvîyartbi. Goreyê vatena Halît Doku no kes lajê Walîyê Tuncelî yê ê demî yo. Nameyê walîyê ê demî Tuncer Soner bî. Erebeya lajê walî Tuncer Sonerî cayo ke Gulîstan tede bîya vîndî uca ra 5-6 reyî derbaz bîyo. Vatena xo de binê xêz kerd ke vîndîbîyayena Gulistan de para lajê walî zî est a û wina vat: “Sareyê nê îşî de lajê walî Tuncer Sonerî û lajê polîsî Zaynel Abarakov est ê. Ez edalet wazena. Roja ke kênaya mi yena kiştene lajê walî pê erebaya xo uca ra 5-6 reyî derbaz beno. Sebebo ke xebera ma nînan ra çîna çî yo? Qey serê nê çîyan gênê û ma de pare nêkenê. Ma çend rey ameyîme, şîme, hundê dej dî, hendê hêsîrîye ma rê bes nîya? Çêneka ma, ma rê bîyarê.”
