Komela Hunermendanê Kurd, mîtîngo ke 4ê çeleyî de seba waştîşê azadîya fîzîkî ya Rayberê Şarê Kurdî Abdullah Ocalanî do bêro kerdene vengdayîşê beşdarîye kerd.
Komela Hunermendanê Kurd, sazgehê Kultur û Hunerî yê Dîcle Firatî de seba mîtîngo ke 4ê çeleyî de seba waştîşê azadîya fîzîkî ya Rayberê Şarê Kurdî Abdullah Ocalanî do bêro kerdene eşkerayîyêk daye.
Eşkerayî de pankartê “Mafê hevîyê mafê çand û hûnera azad e” ame akerdene. Eşkerayî hetê endama yewîya hunermendan Salîha Ayata ra ame wendene. Salîha Ayata qîmetê huner û kulturî ser o vinderte û wina vat: “Huner tenê şeklê estetîkî nîyo, hiş hêvî û dejê yew şarî yo. Wexto ke kultur û huner ame bêvengkerdene, komel yeno bêvenkerdene. Tarixî zaf reyan nîşanê ma da ke wexto ke hêrişê asîmîlasyonî benê verî tedaya ziwanî kenê û dima zî hişî ra kenê û peynîya peyêne de zî komele bêteqet kenê. Komelo ke bêteqet mend endî işxal û kolonîkerdiş zî rehet beno”
Vengdayîşê beşdarîya mîtîngî
Eşkerayîya ke hetê Salîha Ayata ra ameye wendene seba beşdarîya mîtîngî wina vengdayîş ame kerdene: “Kultur û hunerê kurdan seserrî yo ke Kurdîstan de ameya asîmîlekerdene û qedexekerdene. Ziwanê dayîke qedexe kerd, kilamî nêdayî vatene, fîlmî ameyî sansurkerdene, kîlît dîya berê tîyatroyan ro û hunermendê ma yan ameyî hepiskerdene yan zî ameyî surgunkerdene. Nê tedayê ke serê hunerî de ameyê kerdene, sebebê xo est ê. Ney zî wina yê: Huner rastîye vejeno orte û sere ro nênanê. Ewro sey hunermendanê Kurd seba ke rastîye vejîya orte, ma ameyîme têhet.
Ma vengdayîşê birêz Abdullah Ocalanî yo ke 27ê sibate de kerd, pêşwazî kerd û pawit. A roje ra heta na roje Têgêrayîşê Azadîye û şarê kurd seba Komelê Demokratîk û Aştî gamê tarîxî eşt ê. Ma şarê kurd, hunermend, wendekar û xortan û herkesî silaynenê mîtîngî.”
