Bi pêşengiya MEBYA-DERê serdana şîna endamê HPGê Ahmet Furkan Kaya hat kirin. Di şînê de peyama dilsoziya bi cangoriyan re hate dayîn.
Bi pêşengiya Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirin re (MEBYA-DER) bi girseyî serdana şîna gerîlayê HPGê Ahmet Furkan Kaya (Ronî Çiya Alîdaş) ku di 5ê Mijdara 2022yan de li Herêma Zapê jiyana xwe ji dest dabû hat kirin. Ji bo Kaya li Mala Şînê ya Çewligiyan a li Taxa 5ê Nîsanê ya navçeya Rezanê ya Amedê şîn hatiye danîn. Rêveberên MEBYA-DERê, DEM Partiyê, DBPê yên bajêr û navçeyan, aktîvîstên TJAyê, rêveberên MED-DER, MED-TUHAD-FED, TUAY-DER, Komeleya 78an, Dayîkên Aştiyê, endamên Meclîsa Ciwanan a DEM Partiyê, Hevşaredarên navçeyan, nûner û endamên rêxistinên sivîl beşdarî serdana şînê bûn.
Girseya ku meşiya ber mala şînê dirûşmeya “Şehîd Namirin” berz kir. Piştre girse derbasî hundir bû. Dua û fateîhe hatin xwendin. Ji bo bîranîna cangoriyên têkoşîna azadiyê rêz hate girtin.
‘Divê her kes ji paradîgmaya demokratîk fêm bike’
Rêveberê MEBYA-DERê Mehmet Emîn Kiliç di serdanê de axivî û got: “Di têkoşîna azadiyê de Ronî Çiya Alîdaş jî wekî her hevalekî me tev li nava karvane azadiyê bû. Em dibêjin serê malbatê, Gelê Kurd û serê Rêber Apo sax be. Têkoşîna PKKê jî dişibe têkoşîna hemû pêxemberan, çawa ku wan xwestiye ji bo hemû civakan aştiyek mayînde bikin a PKKê heman e. Tevgera Azadiyê jî dixwaze aştiyeke mayînde di nava hemû civakan de bide avakirin. Têkoşîna ku 50 sal in didome, hê jî kesên ku li dijî vê têkoşînê şer dikin têkoşînê fêm nekirine. Hêvî û rica me ji hemû gelê me ye, divê herkes rêgezên paradigmaya demokratîk a ku Rêber Apo daye avakirin divê em fêm bikin.”
Şîn bi serdana gel berdewam kir.
