Deklarasyonê mîtîngê “Hêvî û Azadîye” yo ke do 4ê çeleyî de Amed de bêro kerdene, rayapêroyî reyde ame parekerdene.
Deklarasyono ke hetê Platformê Sazgehanê Demokratîkî ra ame hazirkerdene, kombîyayîşê çapemenîye de ke Qonaxê Cemîl Paşayî de ame kerdene, ame eşkerakerdene. Kombîyayîşî de Hemserekê Pêroyî yê DBP’yî Çîgdeme Kiliçgun Uçar û Keskîn Bayindir, Hemverfeka HDK’yî Meral Daniş Beştaş û Alî Kenanoglu, Hemserekê Pêroyî yê DEM Partî Tuncer Bakirhan û xeylê temsîlkarê partîyanê sîyasî û rêxistinê komelê sîvîlî beşdar bîyî.
Deklarasyonê bi sernameyê “Seba hêvî û azadîye nika wextê wirzîyayîşî yo” de vengdayîşê serekeyî û waştişê mîtîngî ameyê rêzkerdene. Deklarasyonî de ame dîyarkerdene ke şertê Rayberê Şarê Kurdî Abdullah Ocalanî goreyê prosesî krîtîk û muhîm ê û wina ame vatene: “Kilîtê waûbirayîya tarîxî û huqûqê aye ‘heqê hêvî’ de yo, caardişê ‘heqê hêvî’ de yo.”
Deklarasyonî de ame vatene: “Averşîyayîşê ke dinya û Rojhelatê Mîyanênî de yenê vînayene hem mojnenê ke hewcedarîya neweyî est a hem zî no newebîyayîş bi waştişê azadîye û pîyaciwîyayîşê şaran mumkin o.
Se serrî bi înkarê estbîyayîşê şarê kurdan û binpaykerdişê heq û waştişanê înan, bi faîlanê meçhulan vîyartî. Rîyê têkoşînê demokrasî û azadîye yê kurdan ê bêmbênî ra kurdî na seserre de ameyî hespkerdene, surgunkerdene. Ewro şarê kurdî bi têkoşînê xo resayo merhaleyêka muhîme. Rayberê Şarê Kurdî Abdullah Ocalanî 15ê şubate 1999î de bi komployêkê mîyanneteweyî ame ardene Tirkîya û proses ke bi tecrîdê Îmralî dewam kerd, hedef temamkerdişê kêmanîyanê dewleta neteweyî ya yewperestî bî. Ame waştene ke kurdî bê nasname û îrade bêrê verdayene. Îqtîdar û dewlete binpaykerişê heqan û bêhuqûqîya ke Îmrali de dest pêkerd, açar polîtîkaya bingeyî ya dewlete.
Cehdkerdişê çareserîye û qiseykerdişê sîstemê alternatîfî yê tarîxîyan ra, bi Vengdayîşê Aştî û Komelê Demokratîkî yê 27ê sibate her deqa, her roja nê prosesî ke eşkeno bibo wesîle ke şer û dewrê şerî yo serran biqedîyo, têkoşînê demokrasî, azadîye û seypîyîya awan bikero û demêko zaf derg dewam bikero.
Goreyê qeraranê Mehkemeya Heqanê Merdiman a Ewropa û huqûqê globalî, goreyê erjnayîşê Komîteya Wezîranê Heyetê Ewropa û naye ra zêde goreyê îradeyê şarî ke huqûqê nuştekî ra zî aver o, ganî ‘heqê hêvîye’ bê ereykewtene bêro caardene. Kilîtê netewa demokratîke, Komarê Demokratîkî, birayîya tarîxî û huqûqê aye girêdayeyê heqê hêvîye de yo, caardişê heqê hêvîye de yo.
Ma vengdanê heme şaran ke 4ê çele roja yewşeme Meydanê Îstasyonî de bêrê têhet û berpirsîyarîye bigîrê.”
