Senatorê Herêma Otonom a Baskan Josu Estarrona Elizondoyî dîyar kerd ke azadîya Rayberê Şarê Kurdî Abdullah Ocalanî garantîya prosesî ya û vat: “Ganî fikrê Ocalanî bi formêko hîna pêtêr komelî de bêrê entegrekerdene.”
Konferansê Mîyanneteweyî yê Aştî û Komelê Demokratîkî ke DEM Partî 6 û 7ê kanûne de Stenbol de organîze kerd, zaf sîyasetmedar û akademîsyenê pispor ê welatanê cîya-cîyayan beşdar bîyî. Konferans de beşdaran îfade kerd ke ganî Rayberê Şarê Kurdî Abdullah Ocalan ke Îmrali de yeno girewtene, azad bibo.
Grûbêka heyetan ke beşdarê konferansî bîyê, dima ra şîyê Amed. Tîya de bi sazgehanê cinîyan û şaredarî reyde pêvînayîşî kerdê û cayê tarîxî yê Sûrî û Girê Mirazan ra gêrayî.
‘Bi piştîpêdayîşêko tarîxî ez beşdarê konferanse bîya’
Senatorê Herêma Otonom a Baskan Josu Estarrona Elizondoyî ke heyetî de ca girewtêne, hem çimdarîya konferanse hem zî erjnayîşê xo yê derheqê prosesî de ajansê ANF’yî reyde pare kerdê.
Estarronayî vat ke sebebê bingeyin ê beşdarbîyayîşê înan ê konferansî, piştîpêdayîşêko tarîxî yê Herêma Baskan û EH Bilduyî ya seba têkoşînê şarê kurdan o. Estarronayî ard vîrî ke Herêma Baskan neteweyêka bêdewlet a ke di dewletan û strukturanê cîya-cîyayan ameya parçekerdene.
Estarronayî vat ke o bi hêz bawer keno ke şarê kurdî dest bi aştî kerda û nê prosesî ra agêrayîş çin o.
‘Rayberî nêeşkenê bêrê tecrîdkerdene’
Estarronayî îşaret kerd ke tayê qismê dewletan bi girewtişê rayberanê sîyasîyan û bi amancê cuya sîyasî ra dûrîverdayîşê înan, gamanê aştî asteng kenê û îfade kerd ke na xeletîyêka girs a: “Ganî kadroyo rayber bieşko komelî reyde têkilî rono, ruhê şarî biwano, nêzdîbîyayîşêko pedagojîk awan bikero û qismê ke nêameyî îqnakerdene, îqna bikero. Îzolekerdişê rayberan, ameyoxî de problemanê neweyan ano.”
‘Aştî û demokrasî seba herkesî qîmetin ê’
Estarronayî vat ke Vengdayîşê 27ê sibate yê Rayberê Şarê Kurdî Abdullah Ocalanî seba Rojhelatê Mîyanên û sîyasetê globalî zaf muhîm o: “Paradigmaya ke Ocalanî pêşkêş kerda, seba çareserîya problemanê sîyasî û komelkî yê herême gama destpêkî ya. Ez bawer kena ke vengdayîş û fîkrê Rayber Ocalanî hêzê binpaykerdişê zîhnîyetê faşîzan o.”
‘Ganî Ocalanî azad bibo’
Estarronayî bale ante azadîya Rayberê Şarê Kurdî Abdullah Ocalan û garantîya prosesî ser o û wina vat: “Ganî fikrê ey bi formêko hîna pêtêr komelî de bêrê entegrekerdene. Rayîrê resayîşê komelêkê aştîyane û demokratîkî yê Kurdîstanêko azad zî, tîya ra vîyareno.”
