Hemserekê MED TUHAD-FED’î Kerem Canpolatî ard ziwan ke ê pêvînayîş û mesajê Abdullah Ocalanî wayîrê mana û erjî vînenê û va: “Ganî heme sîyasetmedarê nê welatî, desthilatdarî û muxalefet û şarê Tirkîya goş bidê veng û mesajanê rêzdar Abdullah Ocalanî.”
Heyetê DEM Partî ke Pervîn Buldan û Sirrî Sureyya Onder ra pê ameybî, 28ê Kanûne de Hepisxaneyê Girawa Îmraliyî de Rayberê PKK’yî Abdullah Ocalanî reyde pêvînayîşêk kerd. Heyet 29ê Kanûne de zî bi îzahatê nuştekî fikr û vatişanê Abdullah Ocalanî raya pêroyî reyde pare kerdî. Heyeto sîyasî tewr peynî aşma nîsana 2015î de Abdullah Ocalanî reyde pêvînayîş kerdbî. A roje ra dima tecrîdê Abdullah Ocalanî ame zorkerdene û 21ê adara 2021î ra agahdarî ey ra nêameyêne girewtene.
Hemserekê Federasyona Komelaya Huquq û Piştgirîya Keyeyanê Hepsîyan a Medî (MED TUHAD-FED) Kerem Canpolatî derheqê pêvînayîş û mesajê Abdullah Ocalanî de Ajansa Welatî rê qisey kerd.
‘Ma pêvînayîş û mesajî wayîrê mana vînenê’
Kerem Canpolatî dîyar kerd ke ê şîyayîşê hetê Rayberê PKK’yî Abdullah Ocalanî wayîrê mana vînenê û va: “Ma no avêrdayîşê game baş vînenê. Ma hêvî kenê no avêrdayîşê game seba welatê ma Kurdîstanî û seba Tirkîya bibo gamê çareserî û heqê merdiman. Bibo ke şarê Kurd heqanê xo yê demokratîkan pêroyîne bigîro.”
‘Ganî her kes goş bido nê vengî’
Kerem Canpolatî ard ziwan ke Abdullah Ocalan wazeno nê welatî de aştî virazîyo û wina qisey kerd: “Rêzdar Ocalan wazeno ke mabênê hêzan de ke yewbînan ro danê, aştî û çareserîyêk bêro meydan. Rêzdar Abdullah Ocalanî verê zî seba aştî û çareserî gamî eştbi û her tim veng dayêne. Nika zî seba ke nê qiseyê ey ê wayîrê mana hewa de nêmanê ganî her kes bikewo mîyanê cehdan. Rêzdar Abdullah Ocalanî reyna sey her rey îradeyê xo nîşan da. Hêz û bawerîya ey a çareserî est a. Ganî heme sîyasetmedarê nê welatî, heme desthilatdarî û muxalefet destê xo bidê ci. Seba ke Kurdîstan û Tirkîya alozîyanê Rojhelatê Mîyanênî ra xelesîyê. Reyna ez tekrar kena, lazim o ke desthilatdarî û dewlete veng û mesajê rêzdar Abdullah Ocalanî hewa de nêverde. No do heme şaranê Rojhelatê Mîyanênî no şerê ke est o, tira vejê. Ma veng danê heme hêz, sazgeh, dezgeh û şaran ke goş bidê nê vengî û îradeya xo seba çareserî bierzê meydan.”
‘Êdî wextê azadîya rêzdar Abdullah Ocalanî ameyo’
Kerem Canpolatî da zanayene ke ê wazenê no pêvînayîş tayê rehet û rindêr biramîyo û va: “Seba ke no proses bi rehetî biramîyo ganî rêzdar Abdullah Ocalan azadîya xo ya fîzîkî bigîro. Êdî wextê ci ameyo ke rêzdar Abdullah Ocalan bi hawayêko fîzîkî teber ra bo. Seba ke heme hetanê nê welatî reyde pêvînayîşan bieşko bivirazo ke çareserî hîna lez virazîyo.”
