Dîrektor Mîral Kilo derheqê fîlmê xo yê bi nameyê ‘Baxçeyê Ma de Darêka Zeytune est bîye’ ke Festîvala Fîlman a Amedî de ame pêşkêşkerdene dîyar kerd ke ê wazenê bi rayîrê sînemayî waştişanê xo îfade bikerê û vat: “Mi zî waşt bi rayîrê fîlmê ‘Baxçeyê Ma de Darêka Zeytune est bîye’ hîkayeya Efrînijan pare bikera.”
Festîvala Fîlman a Amedî ya 3. bi piştgirîya Şaredarîya Amedî ya Şaristanê Girdî û bi organîzatorîya Komela Akademîya Sînemayî ya Rojhelatê Mîyanên û Sînebîrî yena organîzekerdene. Her hetê Kurdîstan û Tirkîya ra bi desan dîrektor û produktorî beşdarê festîvale bîyê. Dîrektoro Rojavayij Mîral Kilo zî bi f^İlmê xo yê ‘Baxçeyê Ma de Darêka Zeytune est bîye’ beşdarê festîvale bî. Fîlmê ‘Baxçeyê Ma de Darêka Zeytune est bîye’ hîkayeya Efrînijan ser o ya. Dîrektor Mîral Kilo derheqê fîlmê xo yê ‘Baxçeyê Ma de Darêka Zeytune est bîye’ û kulturê kurdî ser o Ajansê ma rê qisey kerd.
‘Hîkayeyê muhîmî bi rayîrê fîlman yenê mojnayene’
Mîral Kiloyî dîyar kerd ke na festîvale seba dîrektoranê kurd muhîm a û nê çîyî vatê: “Festîvala Fîlman a Amedî demêko derg ra pey reyna yena kerdene. No cayê sereberzî yo. Ewro hîkayeyê muhîmî bi rayîrê fîlman yenê mojnayene. Huner û kultur seba fîlman muhîm o. Amancê ma zî o yo ke ma hîkayeyanê şarê xo bi ziwanê xo bîyarê ziwan. Xeylê serran ziwanê Kurdkî ame qedexekerdene, destûre nêameye dayene ke ma dejanê xo bi rayîrê fîlman pare bikerê. Ma ewro dejanê xo bi ziwanê xo yê dayîke pare kenê.”
‘Ma wazenê bi rayîrê sînemayî waştişanê xo bîyarê ziwan’
Mîral Kîloyî dîyar kerd ke fîlmê Kurdkî kulturê Kurdkî ser o tesîr keno û vat: “Ma xeylê aştîwaz ê. Ma bi rayîrê hunerî wazenê heqanê xo bîyarê ziwan. Ma prosesêko zor û zehmetî de yê la ma zanê ke sînema zî xebatêka seba kulturî yo. Ma wazenê bi rayîrê sînemayî waştişanê xo bîyarê ziwan. Festîvale seba ma xeylê muhîm a seba ke bi ziwanê Kurdkî yena kerdene. Ameyîşê min ê Amedî sey hewnêk bi. Ewropa de vatîşêk est o, vanê, ‘Sûrê Fransayî hunerê Ewropayî pawenê.’ Demo ke ez ameya Amed mi dî ke Sûrê Amedî zî hunerê Kurdkî pawenê.”
‘Mi zî waşt bi rayîrê fîlmî hîkayeya Efrînijan pare bikera’
Mîral Kiloyî îfade kerd ke fîlmê ‘Baxçeyê Ma de Darêka Zeytune est bîye’ hîkayeya şarê Efrînî ya û qiseykerdişê xo wina qedîna: “Ez zî Rojava ra ya. Ma kam parçeyê Kurdîstanî ra bibî zî hîkayeyê ma yew ê. Demo ke hêrişê Efrînî ame kerdene, ma dinya de tu vengêk nêeşnawit. Mi zî vatêne, ‘çira çîyê ke Efrîn de ameyêne kerdene, çira xeberan de ca nêgirewtêne.’ O semedî ra mi waşt bi rayîrê fîlmê ‘Baxçeyê Ma de Darêka Zeytune est bîye’ hîkayeya Efrînijan pare bikera.”
