Hukmatê Kolombîya û rêxistina tewr girsê çekdaran ê welatî Clan del Golfo, paytextê Qeterî yê Doha de seba bêçekbîyayîşî û awankerdişê aştîye binê beyannameyêkê hemparî de îmza eşt. Çarçewaya peymanî de, hîrê mintiqayan de seba derbasbîyayîşê endamanê rêxistine yê ciwîyayîşê sîvîlî, do “Mintiqayê Cabîyayîşê Demkîyî” bêrê awankerdene.
Mîyanê Hukmatê Kolombîya û grûba ke sey rêxistina tewr girsê çekdaran ê welatî yeno zanayîş Clan del Golfo (Kartelê Kendalî) de, netîceya tûra dîyine ya muzakerayanê ke bi mazûmanîya Qeterî rayra şîyêne de, peymanêka hempare ameye îmzakerdene. Beyannameyê ke nameyê “Peymanê Doha” dîyayo ci, bêçekkerdişê rêxistine û awankerdişê aştîye yê mintiqayanê ke tede pêkewtişî zaf ê, hedef keno.
Peymana ke bi mîyanbênkarîya Qeter, Norwec u Swîsre ameye kerdene; Kolombîya de ke serranê dergan ra nata pêkewtişê zereyî tede qewimîyenê, seba hewlkerdişê şertanê cuye yê komelanê ke maruzê şîdetî mendê, seba pêşkêşkerdişê firsendanê neweyan ciwanan rê, seba caardişê edaletî mexdûran rê û seba ke pêkewtiş newe ra nêvirazîyo, wayîrê muhîmîya cuye ya.
Goreyê xebera Gazete Oksijenî, welatê mîyanbênkarî îşaretê zehmetîyanê cîddîyan kenê ke ganî terefî înan bivejê ser: Da zanayene ke caardişê peymanî şefafîye, bawerîya yewbînî û pabesteyîya domdare icab keno; hetê bînî ra seba serkewtişê prosesî muhîmîya hemkarîya bi rêxistinanê komelê sîvîlî û dezgehanê mîyanneteweyîyan ame destnîşankerdene.
Çarçewaya peymane de do çi bêro kerdene?
Goreyê peymana ke ameya îmzakerdene, hûmara qezayanê ke do tede zîretê madeyê hîşberî nêro kerdene û Clan del Golfo tede çalak o, 10 teneyî ameye zêdekerdene û vejîyaye 15.
Bi nê averşîyayîşî ra pîya, bi raştkerdiş ke plan beno 1ê Adara 2026î de bikewo merîyetî, hîrê mintiqayanê cîya-cîyayan ê Kolombîya de seba ke endamê rêxistine çekanê xo veradê u derbasê heyatê sîvîlî bibê, do “Mintiqayê Cabîyayîşê Demkîyî” (ZUT) bêrê awankerdene.
Clan del Golfo ke texmîn beno nêzdîyê 9 hezar endamê ci estê û sey Artêşa Gaitancîye ya Kolombîya zî yeno zanayene; welat de sey rexistina sucî yê tewr girsî yeno qebulkerdene ke bi çalakîyanê sey qaçaxçîyîya madeyê hîşberî, madenkarîya nêqanûnî û qaçaxçîyîya koçberan eleqedar o.
