Şar bawer keno ke fikr û pêşnîyazê çareserîye yê Îmrali, kilîtê problemê Rojhelatê Mîyanênî yo. Şarê Qamişloyî têkilîya Îmrali sey mijdanî erjnaye û bawerîya xo ya fikranê Îmrali ser o vinderte.
Heyeto ke 2 kesî yê DEM Partî ke Pervîn Buldan û Sirrî Sureyya Onderî ra pê ameyo, roja şeme (28ê Kanûne) şî Îmralî û Ocalanî reyde têkilî rona. DEM Partî na têkilî ra dima vizêr (29ê Kanûne) eşkarayîyêk vila kerd.
Qamişloyijanê ke derheqê meseleyî de qisey kerd, fikranê Ocalanî ser o vindertî û vanê do aştî bêro. Şerîf Hecî Mehmûdî wina vat: “Mesajê Ocalanî aştî ser o bi û ma zî paweyê ney bîyê. O seba Kurdîstanî û Rojhelatê Mîyanênî aştî wazeno. Azadîya şarê Kurdî û şarê Tirkî pîya erjneno.”
Necah El-Umerî zî va ke ê demêko derg o paweyê erjnayîşanê Ocalanî bîyê û moralê înan bi mesajî berz bîyo. Aye wina vat: “Ocalan, do bi fikranê xo ma biresno amancê ke ma wazenê. Ma do her dem goreyê felsefeyê Ocaalanî hereket bikerê. Çareserî do bi erjnayîşanê rayberîya ma bêro.”
Hêvîn Hesenî va ke heta Ocalanî ser o îşkence û sistemê qirkerdiş dewam bikero, mintiqa de aştî nêyena. Aye wina dewam kerd: “Kilîtê aştî yê Rojhelatê Mîyanênî destê Ocalanî de yo. Rayberê ma ferq dekeno mîyanê şaran û bi fikranê ci îradeyê ma û hêvîya ma benê xurt.”
