DEM Partî do 6 û 7ê kanûne de Stenbol de “Konferansê Mîyanneteweyî yê Aştî û Komelê Demokratîkî” organîze bikera. Kurdîstan, Tirkîya û xeylê welatanê dinya ra do kesayetê namdarî beşdarê konferansî bibê.
Partîya Têduştî û Demokrasî ya Şaran (DEM Partî) do 6 û 7ê kanûne de Stenbol de “Konferansê Mîyanneteweyî yê Aştî Û Komelê Demokratîkî” organîze bikera. Konferansî de vengdayîşê Aştî û Komelê Demokratîk o ke Rayberê Şarê Kurdî Abdullah Ocalanî 27ê sibate de kerdbi, bêro munaqeşekerdene. Kurdîstan, Tirkîya û qadê mîyanneteweyî ra xeylê kesayetê namdarî do beşdarê konferansî bibê. Baskî ra heta Afrîka, Kazakîstan û Belçîka ra xeylê kesî do beşdarê konferansî bibê. Sewbîna rêxistina Îrlandayî Sînn Feîn zî do beşdarê konferansî bibê.
Konferansî de serebûtê, “Şer û çareserî”, gamê tarîxî seba demokratîkbîyayîşî û hempeymana komelkî ya newa ganî senî biba, bêrê munaqeşekerdene. Konferans do di rojan dewam bikero û qadê mîyanneteweyî xeylê kesayet û rojnamegerî zî ameyê silaynenê.
Prof. Norman Peach zî do beşdarê konferansî bibo
Heta nika kesê ke nameyê înan dîyar bîyê û beşdarê konferansî bibê, nê yê: “Endamê Meclîsê Federal ê Almanyayî yê verê Profesor Norman Peach, muzakerekerdoxo serekê yê prosesê aştî yê Başûrê Afrîkayî avûkat Mohammed Bhabha, parlamneterê parlamentoyê Baskî û koordînatorê têkilîyanê mîyanneteweyî yê Bilduyê Igor Zalaika, parlamenterê Belçîkayê Georges Dallemagne, unîversîteya Damanhour a Misirî ra pisporê tarîxê modernî Prof. Dr. Mohamed Refaat, Sendîkaya UNITE the Union ra dîrektorê têkilîyanê mîyanneteweyî Simon Dubbins. Do nê kesayetî beşdarê konferansî bibê. Sewbîna ame zanayene ke qadê mîyanneteweyî ra xeylê kesê bîn ê namdarî zî do beşdarê konferansî bibê û nameyê înan zî do rojanê ameyoxî de bêrê dîyarkerdene.
Reyna Veysî Aktaş ke 10 serrî Girawa Îmraliyî de Rayberê Şarê Kurdî Abdullah Ocalan reyde mendo, o zî do beşdarê konferansî bibo. Sîyasetmedar Gultan Kişanak, rojnameger Haydar Ergul, endamê Heyetê Îmraliyî û avûkatê Buroyê Hiqûqî yê Seserrî Faîk Ozgur Erol, hiqûqzan Orhan Gazî Ertekîn, rojnameger Nadîre Mater û Hemsereka Pêroyî ya vere ya ÎHD’yî Eren Keskîn zî do sey qiseykerdox beşdarê konferansî bibê.
Detayê Konferansî
Konferans do 2 rojî dewam bikero. Roniştişo yewin ê konferansî do bi sernameyê “Perspektîfê aştîya komelkî’ bêro kerdene. Roniştişî de do babetê sey, “Seba çareserîya meseleyê kurdî û aştîya komelkî de rolê Abdullah Ocalanî û heqê hêvî”, “Awankerdişê hiqûqê aştî de rolê raybertî” , “Tirkîya de tesîrê aştîya komelkî û çareserîya domdare ya hemsencîya herêmî û globale ser o” , “Aştîya komelan û vîzyonê aöeyoxî; cuya pîya do senî biba?” bêrê munaqeşekerdene.
Roniştişo diyîn ê konferansî de zî do bi sernameyê “Serebûtê pirodayîş û çareserîyan” bêro kerdene. Nê roniştişî de zî do babetê; “Serebûtê Baskî” , “Serebûtê Vakurê Îralndayî” , “Muzakereya Katolonya û Îspanyayî; dersê pirodayîşanê asîmeterîk” , “Serebûtê piştgirîya qadê mîyannetweyî yê seba teqezbîyayîşê qedîyayîşê şer û caardişê aştî” , “Aştîya komelkî berê hepisxaneyan; seba bedilnayîşê sîstemê hepisxaneyan, rayîrêko senî lazim o?” bêrê munaqeşekerdene.
‘Netewe-dewlete ra ver bi Netewa demokratîke’
Roja dîyin a konferansî de do roniştişo ewilin bi sernameyê, “Netewe-dewlete ra ver bi Netewa Demokratîke” bêro kerdene. Nê roniştişî de do “Hempeymanêka newe ya binê şewqê pênaseyê nasname û hemwelatîbîyayîşê qanûnê bingeyînî de” , “Muhîmîya serebûtanê tarîxî seba awankerdişê Netewa Demokratîke” , “Têkoş^İnê vera têkilîyanê hegemonîk, nemerkezîbîyayîşî û xurtkerdşişê demokrasîyê herêmî” , “Sebe heqîqetê azadîya çapemenî û ziwanê aştî” bêrê munaqeşekerdene.
Roniştişo dîyin ê roja dîyine de zî konferans do bi sernameyê “Perspektîfê ameyoxê aştî û azadîye” dewam bikero. Roniştişî de babetê sey; “Babeta kurd ke bîya babetêka mîyanneteweyî, eşkena bi nakokîya îqtîdar-komelî bêra çareserkerdene yan nê?” , “Îmkanê bedilnayîşê dînamîkanê aştîya globale û herêmî ya têkoşînê kede ke sînoran vîyareno” , “Bedilnayîşê şeklê zîhnîyetê Ewropayî yê derheqê babeta kurd de; Perspektîfê aştî û azadîye zemînê heqanê takekesî rê bibo zemînê heqanê kolektîf” , “Manîfestoyê Ocalanî; Perspektîfê Aştî û Komelê Demokratîkî” bêrê munaqeşekerdene.
