Hemserekanê Pêroyî yê DEM Partî Tulaye Hatimogullari û Tuncer Bakirhanî derheqê şîyayîşê Îmraliyî de wina vat: ”Zîyaretê Îmraliyî rayîrê qedînayîşê dejanê bi serran û tesîskerdişê pêkerdişê komelkî de do bibo gamêka tarîxî.”
Hemserekanê Pêroyî yê DEM Partî Tulaye Hatimogullari û Tuncer Bakirhanî derheqê qerarê komîsyonî yê şîyayîşê Îmraliyî de nê vatî:
“Ma qerarê şîyayîşê Îmrali yê Komîsyonê Demokrasî, Wayûbiratîye û Paştdayîşê Mîllîyî yo ke ewro ame girewtene, sey îfadeyê îradeyê aştîye pêşwazî kenê. Zîyaretê Îmrali yo ke do bêro kerdene, rayîrê qedînayîşê dejanê ke bi serran o yenê ciwîyayene û tesîskerdişê pêkerdişê komelkî de do bibo gamêka tarîxî. Zemînê dîyalogî yo ke do Îmrali de bêro ronayene semedê çareserkerdişê meseleya kurdan û demokratîkbîyayîşê Tirkîya firsetêko bêhempa yo. Şîyayîşê komîsyonî yê Îmrali semedê Tirkîya do bêro newe abikero; herinda sîyasetê tersî de hêvîya pîyaciwîyayîşî bigîro.
Pêvînayîşê bi Birêz Ocalanî semedê averşîyayîşê prosesî zaf muhîm o. Endamê komîsyonî ke nê zîyaretî kenê, ma înan pîroz kenê û pêro partîyanê ke rol girewt xo ser û Serekê Meclîsî Numan Kurtulmuşî rê spas kenê. Reyna ma Birêz Receb Erdogan û Birêz Devlet Bahçelî yê ke berpirsîyarîya sîyasîyî girewt û partîyanê îttîfaqê xo EMEP û TÎPî rê zî spas kenê.
Rolo esasî yê sîyasetî o yo ke goreyê menfeatê welat û şarî çareserî biafirno. Coka no qerar tam na berpirsîyarîye nîşan dano. Çi heyf ke tay hetê sîyasîyî na gama tarîxî ra dûrî de vindetî. Prosesanê aştîye de tim cesaret û tewiro vîzyoner yenê teqdîrkerdene. Teredut û remnayîşî wîjdanê komelkî birîndar keno. Wextanê winayênan de semedê ameyoxê şarî ganî çew pîya rayra şiro. Bi na wesîle ma reyna veng danê ke wa her kes berpirsîyarîya xo bîyaro ca. Gamê cesûrî yê ewroyî ameyoxî danê qezenckerdene. Ma hêvî kenê ke no zîyaret bibo wesîleya aştîya mendî. Înşakerdişê aştîye wezîfe û berpirîyarîya ma pêrun o.”
