Verfeka DEM Partîye Ayşegul Dogan ard ziwan ke wa komîsyon qerarêko pozîtîf seba şîyayîşê Girawa Îmraliyî bido û veng CHP û partîyanê sîyasî kerd ke bi awayêko pozîtîf nêzdî bibê.
Verfeka Partîya Têduştî û Demokrasî ya Şaran (DEM Partî) Ayşegul Dogan derheqê serebûtanê rojeve de merkezê pêroyî yê partîya xo de beyanat da. Ayşegul ard ziwan ke Heyetê Rayberîya Merkezî ya partîya înan kom bîyo. Dogan îdiaya rojnameyê Sozcuyî ke vatbi DEM Partî xo bêveng keno zûr kerd û reaksiyon nîşan da.
‘Mîmarê prosesî Birêz Ocalan o’
Ayşegul Dogan şîyayîşê Girawa Îmraliyî û pêvînayîş bi Rayberê Şarê Kurdî Abdullah Ocalanî reyde ser o veng da û wina va: “Komîsyon do bibo nexşerayê merhelaya 2ine ya prosesî. Meraq beno ke partîyî do pozîsyonêkê senî bigîrî. Ma pêro pîya yew tecrûbeyêko tarîxî ra rî bi rî yê. Ma vanê ke komîsyon şîro Îmraliyî ya nê. Cevab aşkera yo. Çîyê ke qisey beno aştî ya û mîmarê ci zî Birêz Ocalan o. Tiya de yew roleyêko pîl keweno milê partîyan ser. Ma yew merhelayêka tarîxî de yê û gerek na merhela vindertî nêbo. Çîyo tewr rast o yo ke pêvînayîş Birêz Ocalanî reyde bêro kerdîş. Gerek pêro partî zî musbet nêzdî bibî û na berpirsyarîya xo bîyarî ca. Birêz Ocalan tena şerêk qedînîno û rayîrê muzakereyî zî akeno. Qalê demokratîkbîyayîşî keno. Eke ma na heqîqetî nêvînî, do proses senî aver şiro?”
Veng da CHP’î
Ayşegul Dogan veng da CHP’î û waşt ke CHP şîyayîşê komîsyonî yê Îmraliyî ser o qerarêko musbet û rast bido. Ayşegul Dogan nîşan kerd ke ser o nameyê DEM Partîyî de Gulistan Kiliç Koçyîgît do şiro Girawa Îmraliyî.
‘Gerek Tirkîye polîtîkayanê xo yê Rojawanî bivurno’
Ayşegul Dogan derheqê averşîyayîşanê Rojhelatê Mîyanênî de zî qisey kerd û va: “Gerek Tirkîye polîtîkayanê xo yê ser o Îdareyê Xoserî yê Bakur û Rojhelatê Sûrîyeyî bivurno. Lazim o ke Tirkîye kurdanê Rojawanî sey yew tehlûke nêvîno. Gerek Tirkîye, Rojawan reyde têkilîyanê dostaneyî aver bibero. Problemî bi muzakereyî çareser benî. Aştîyêka mintiqayî bi no awayî virazîyena. Pawitişê ma zî o yo ke Tirkîye nê gaman bierzo. Gelo eke beranê sînorî abîbî do hewl nêbo?”
