Temsîlkarê Kovara Gerçekî yê Amedî Namik Taranci serrgêra kiştişê xo de ame yadkerdene.
Temsîlkarê Kovara Gerçekî yê Amedî Namik Taranci ke 20ê teşrîna peyêne ya 1992î de taxa Kaynartepe ya qezaya Rêzana Amedî de bi hêrişo çekdarî cuya xo vîndî kerdbî, ame yadkerdene. Yadkerdiş bi pêşengîya Rojnameyê Evrenselî Mezela Taranci ya Berê Mardînî ser o ame kerdene.
Serekê Pêroyî yê EMEP’î Seyît Aslan, rayberê EMEP’î, temsîlkarê DÎSK-Basin Îşî yê Amedî Hakki Boltan, Hemserekê Komela Rojnamgeran a Dîcle Firatî (DFG) Selman Çîçek beşdarê yadkerdişî bîyê.
Raybera EMEP’î Denîz Nurgul qisey kerd û rojnameger Namik Taranci ard xo vîrî û wina vat: “Ma ewro serrgêra 33. de reyna Namik Taranciyî yad kenê. Ma do her tim ey yad bikerê. Serranê tewr bi tehluke de Namik Taranci têkoşînê azadîye û sosyalîzmî rayra berd. Namik Taranci hetê Hîzbulkontra ra ame kiştene û kiştoxê ey nêameyê vînayene.”
‘Serrê 90î serrê mîladî bîyê’
Temsîlkarê DÎSK-Basin Îşî yê Amedî Hakki Boltan zî behsê keda rojnameger Namik Taranci kerd û vat: “Serrê 1990î serrê mîladî bîyê. Ê serran de Namik pêşengîya Çapemenîya Azade kerd. Ê serdemî de o û embazê ey ameyê qetilkerdene, ma vernîya şehadet û têkoşînê înan de beşna xo tewnenê. Ma do tu wext keda înan xo vîr ra nêkerê. Ma do hewn û xeyalanê înan bi xebate aver berê.”
Beşdaran dima ke mezela ey ser o qerenfîlî ronayê, programê vîrardişî qedîya.
