Keyeyê endamanê Meclîsê Ciwanan ê DEM Partî Yusuf Demîrpolat û Suleyman Kahraman ke Amed de ameybî girewtene, hepisxane de gedeyê xo zîyaret kerdê û înan dîyar kerd gedeyê înan kerdê hucreyan û weçînitişê qawişanê bêhetî înan rê ferz kenê.
Platformê Ciwananê Welatperwer seba azadîya Rayberê Şarê Kurdî Abdullah Ocalan, bi sloganê “Raybero azad reyde ver bi cuya azade” 18ê teşrîna verêne de rayîrşîyayîşêk organîze kerdbi. Rayîrşîyayîşî ra pey ciwanî hetê nijadperestanê tirk, rayedaranê îqtîdar û Wezîrê Karanê Zereyî Alî Yerlîkaya ra hedef ameyê mojnayene.
Polîsan 21ê teşrîna verêne de est xeylê keyeyan ser o û ciwanê bi nameyê Suleyman Kahraman û Yusuf Demîrpolatî girewtbî.
Keyeyê ciwananê bi nameyê Suleyman Kahraman û Yusuf Demîrpolatî da zanayene ke şîyê Hepisxaneyê Ewleyîya Berze ya bi Hûmara 1. ê Amedî ke gedeyê înan tede yenê girewtene û ê zîyaret kerdê. Keyeyan dîyar kerd ke gedeyê înan eştê hucreyan û weçînitişê qawişanê bêhetî înan rê ferz kenê.
‘Nêverdanê ê şêrê qawişanê embazaqnê xo’
Maya Yufus Demîrpolatî, Rojda Demîrpolat da zanayene ke 18ê teşrîna peyêne de şîyê lajê xo zîyaret kerdo û wina vat: “Lajê mi vat ‘ma hucreya yewwekesî de yê û bi hewayêko psîkolojîk baş nîya. Ma ra vanê yan şima şonê mîyanê kesanê bêhetî yan zî şima do hucre de bimanê.’ Lajê mi zî nê çîyî qebul nêkeno. Nê semedî ra vat eke nı problem nêro çareserkerdene, do dest bi çalakîya grewê vêşanîye bikerê. Nêverdanê ê şêrê qawişanê embazanê xo yê bîn û zilmê şîyayîşê mîyanê kesanê bêhetan kenê.”
Vengdayîşê haydarîye raya pêroyî rê kerd
Rojda Demîrpolat waşt ke lajê ey embazanê xo yê hucreyan berê xo het û dîyar kerd ke ê do dewaya gedeyanê xo ra fekveranêdê. Rojda Demîrpolat da zanayene ke demo ke gedeyê înan dest bi grevê vêşanîye bikerê, ê zî do bikewê grevî û vengdayîşê haydarîye raya pêroyî rê kerd.
‘Ma wazenê hucreyanê yewkesî ra bêrê vetene’
Maya Suleyman Kahraman, Elîf Kahraman zî da zanayene ke ê 19ê teşrîna peyêne de şîyê pêvînayîşê lajê xo û wina vat: “Lajê mi zî hucreya yewkesî de yo. Demo ke ma ey reyde pêvînayîş kerd, vat ke, ‘Eke zilmê înan ma ser o dewam bikero, ma do bikewê grevê vêşanîye. Nê çîyî biresnê rayedaran.’ Ma wazenaê hucreya yewkesî ra bêrê vetene û ey berê embazanê ey het. Ma nêwazenê şêro mîyanê kesanê bêhetî.”
