Serekwekîlê Grûba DEM Partîyî Sezaî Temellî îfade kerd ke ê roja ewile ra vanê ganî komîsyon şêro Girawa Îmraliyî û vat: “Ganî komîsyon êdî qerarê şîyayîşê Îmraliyî bido.”
Serekwekîlê Grûba Partîya Têduştî û Demokrasî ya Şaran (DEM Partî) Sezaî Temellî derheqê hedîseyanê ke rojeve de yê, Meclîs de kombîyayîşê çapemenî kerd. Sezaî Temellî, Hemserekê Pêroyî yê Komela Heqanê Merdiman (ÎHD) Oya Ersoy û Cîhan Aydin ke newe ameyê weçînitene pîroz kerdê û dest bi qiseykerdişê xo kerd.
Sezaî Temellî bale ant qanûnê weqfan ke 3 hewte yo rojevê Meclîs de yo û vat ke qanûnan de nuqtaya 11. amanc keno ke weqf destê rayberîyanê herême de yê, dest bidê ser û reaksîyon vera nê da. Temellîyî dîyar kerd ke tewrê rojevanê muhîm û problemanê komelkî zî no 3 hewte yo AKP’yî bi qanûnanê weqfî xejilîyeno û vat: “Meclîs bi rojevê AKP yan zî yê serdestan reyde xejilîyeno. Problemê şarî û rojevê şarî Meclîs de çin ê. Sewbîna butçeya serra newa zî rojevê şarî ra dûrî ya.”
Cîyayîya şaristananê vakurê Kurdîstanî ser o
Sezaî Temellîyî dîyar kerd ke şaristanê vakurê Kurdîstanî butçeya nikayîne ra îstîfade nêkenê û wina qisey kerd: “Na butçe butçeyeya sermayeyî ya. Her tim butçeya sermayeyî arda vernîya ma. Demo ke ma netêduştîya şaristanan ra ewnîyenê, bi hewayêko şênber şaristanê Kurdîstanî vejîyenê vernîya ma. Şaristananê kurdan de bêedaletî est a. Vanê vatişê ‘şaristanê kurdan’ vera destûrê bingeyîn o. Çira vera yo? Nê şaristanî, şaristanê kurdan ê. Teşkîlatê Plansazîye yê Dewlete butçe kerda 2 beş û beşêk herêma yewine ya û beşêk zî herêma 6. a. Şaristanê kurdan herêma 6. de ca gênê. Herêma 1. Herêma Marmarayî ya. Ferqêko gird mabên de est o. Herinda ke nê ferqî orte ra wedarnê, eksê ci nê ferqî gird kenê û reyna heme çimeyê seba rojavayê Tirkîya rê yenê abirnayene û şaristanê kurdan nêyenê vînayene.”
‘Ganî qanûnê taybetî bêrê amadekerdene’
Eşkerayî ra pey Sezaî Temellî cewap da persanê rojnamegeran. Sezaî Temellî persê qanûnê ke serewedaritişê Şêx Seîdî ra pey ameya vetene, yena munaqeşekerdene ke nê prosesî de zî nê qanûnî zî do bêrê amadekerdene, nê cewabî da: “Vengdayîşê birêz Ocalanî yê 27ê sibate û gama peyêne ya Rayberîya Têgêrayîşê Azadîye yê Kurdîstanî yê 26ê teşrîna verêne, gamê muhîmî ameyê eştene. Ganî gamî bi di hetî bêrê eştene la nê gamî bi yew hetî ameyê eştene. Gama tewr muhîme ya ke ganî heto bîn bierzo, viraştişê qanûnanê taybet o. Qedîyayîê kombîyayîşanê komîsyonî ra pey, do ney ser o raporêk bêro amadekerdene û pêvînayîşan bikero. Ma hêvî kenê ke no proses derg nêramo.”
‘Ganî komîsyon şêro Îmrali’
Seza Temellîyî, persê ‘Do kombîyayîşê siba yê komîsyonî de şîyayîşê Girawa Îmraliyî bêro munaqeşekerdene yan nê?’ zî nê cewabî da: “Yeno zanayene ke kombîyayîşê siba yê komîsyonî de babeta şîyayîşê Îmraliyî rojeve de bo. Do bêro rojeve yan nê ma do siba kombîyayîşê komîsyonî de bivînê. Ma roja ewile ra vanê ganî komîsyon şêro Îmrali. Ma hêvî kenê ke komîsyon demêko nêzdî de qerarê şîyayîşê Girawa Îmraliyî bido û şêro.”
