13ê teşrîna peyêne (siba) şaristanê Qamişlo yê Rojava de do Festîvala Fîlman a Mîyanneteweyî ya Rojava ya 5. dest pêbikera.
Qirkerdişê Sînemaya Amûdê ke serra 1960î de şaristanêkê şenik ê Rojava de bi seyan gedeyî tede veşayê û cuya xo vîndî kerde, tena trjedîyêk nêbi, eynê wextî de tarîxê sînemaya kurd de bi rîpelanê tarî ra yew. Ewro mîyanê a wele ra şewqêk Rovaja ra akeweno: Festîvala Fîlman a Mîyanneteweyî ya Rojava ya 5. do 13ê teşrîna peyêne yanî siba serrgêra Qirkerdişê Sînemaya Amûdê de Qamişlo de dest pêbikera.
Festîvale do bi sloganê “Hîkayeyê Hempar û Sînemaya Azade” sey manîfestoyê xoverdayîşî û bi hişê kolektîf bêra organîzekerdene.
Mîlçika Simurg
Festîvale do vernîya Sînemaya Amûdê de bi merasîmêkê yadkerdişî dest pêbikera. A roje sînemaya ke mîyanê wela 283 gedeyan ra ameye afernayene, do reyna cuye bipawa.
Mîlçika Simurg ke sey sembola festîvale ameya dîyarkerdene, yena manaya mîyanê wela Sînemaya Amûdê ra newera gandarbîyayîş ê.
Çarçewaya festîvale de do 81 fîlm 7 rojî Qamişlo de Merkezê Kultur û Hunerî yê Mihemed Şêxo û Salona Sînema ya Tev-Çandî ya Mezopotamyayî de bêrê mojnayene.
Programê festîvale de 21 dokumanter, 7 fîlmê derg ê bi Kurdkî, 8 fîlmê Sûrîye, 8 fîlmê derg ê mîyanneteweyî û 37 fîlmê kilmî est ê. Fîlmê emserrî bi giranî babetanê xoverdayîş, gêrayîşê azadîye, koç, û têkoşînê komelkî ra yenê pê.
Peynîya festîvale de do merasîmê xelatdayîşî bêro kerdene. Bi nameyê Sirri Sureyya Onder Xelata Heqanê Merdiman û Demokrasî, Xelata Sînemayî ya Mazdek Ararat, Xelata Wêrekîya Cinî ya Azade ya Menîce Haco û Xelata Sînemaya Azade ya Xelîl Dagî do festîvale de bêrê vilakerdene. Nê xelatî tena serkewtişêko hunerî nê, eynê wextî de vindertişêko polîtîk zî temsîl kenê.
Dîrektorê cinî û ziwanê sînema yê azadîpawitoxîya cinî, ruhê festîvale dîyar kenê. Goreyê tayê çimeyan cinî bi rengêko çalak beşdarê her qonaxê nê prosesî bîyê û sînema zî bi nê hewayî bîye wayîrê ewnîyayîşê cinî û ameyo vatene ke Şorişê Rojava şorişê cinî yo.
Festîvale do bi mojnayîşê fîlmê ‘Heval Birako’ dest pêbikero ke hetê Komunê Fîlman ê Rojava ra ameyo amadekerdene. Fîlmo ke senaryoyê ci hetê rojnameger Nazim Daştanî ra hîkayeyêka raste ra ameyo nuştene, hetê Komunê Fîlman ê Rojava ra ameyo berardene.
Dîrektorîya fîlmî zî hetê Numan Yîgît ra ameye kerdene. Festîvale de sewbîna do dokumenterê ‘Hemo’ reya yewine do bêro mojnayene. Beşê sînemaya Sûrîya de fîlmê ke demêko derg qedexe mendê û nêmaeyê mojnayene, reya yewine do bêrê mojnayene. Înan ra tayê fîlmî nê yê: The Immortal Sergeant, The Translator, Ajnabi.
Tewrê mojnayîşê fîlman do festîvale de panel, roportaj, atolyeyê sînema, çalakî û merasîmê xelatdayîşî zî bêrê kerdene.
