Hemwelatijanê Amedî derheqê zêdekerdişê kîraya keyeyan de bi gerre û qazinc ê û vatî ke heqê kîraya keyeya piştîya ma şikita.
Daneyê Sazîya Îstatîskî ya Tirkîyaye (TUÎK) û raştîya mîyanê şarî de yewbînan nêgêno. Bi xususî Amed de vayekerdiş ya zî zêdekerdişê kîraya keyeyan hema vajê her aşme bedilyena. Vayekerdişê kîreyan bêserûber o. Wayîrê keyeyan goreyê xo kîrayan zêde kenî. Amed de her kesê ke xanîyê kîraye de ronişenî seba vayebîyayîşê kîraye bi gerra û qazinc ê û nêrazî yê.
Her wina nê tena Amed de Bakûrê Kurdistan û Tirkîyaye de heme vayebîyayîşê kîraya keyeyan est o. Roj bi roj şar feqîr beno û heqê kîraya keyeyan problemê ekonomîya înan teng kenî. Ameyo daraxo ke welatij êdî nêeşkenî debara xo bikerî.
Ma zî kuçe û papolanê Amed de welatijan ra derheqê vayekerdişê kîraya keyeyan persayî. Ma persa; “Gelo şarê Amedî seba vayebîyayîşê kîraya keyeyan çi fikrîyeno û problemê ekonomîye de çi fikrîyeno?” hemwelatijê Amedî rê kerdî. Welatijan zî persanê ma ercnayî û derheqê ci de gerra û gazinê xo ardî ziwan.
Hemwelatijan da zaneyene ke kîraya keyeyan her ke şono zêde beno, na yew zî verê problemê ekonomîye akeno û heqê kîraya keyeyan pişteya înan şikito.
Hemwelatijan dîyar kerd ke êdî nêeşkenî heqê kîraya xo bidî, heme pere û maeşê înan şono kîraye û no ser zî ganî no pergal bêro bedilnayene.
