Koma Amed ke 30 serran ra pey do 25ê teşrîna verêne de Amed de konserêk organîze bikera, teyarageyê Amedî de bi girseyî ameyê pêşwazîkerdene. Endamê kome Suleyman Çarnewa keyfweşîya xo ya seba pêşwazîkerdişî îfade kerdê û vat: “Aştî û azadîye na ya.”
Koma Amed komanê ke hemkarîya muzîkê Kurdkî kerdî, înan ra yew a. Her deyîra kome hetê des hezaran ra yena goşdarîkerdiş. Koma Amed 30 serran ra pey do Amed de 25ê teşrîna verêne de Qada Newroze ya Amed de konserêk bikera. Konser bi pêşengîya Şaredarîya Amedî ya Şaristanê Girdî, Sanatça Organîzasyon û Şaredarîya Peyasî, bi sloganê “Kulîlkên Azadîye Pêşwazîya Aştîya Komelkî Kenê” do bêro kerdene. Amadekarîyê konserî dewam kenê. Her kuçeyê Amedî bi afîşanê silayîya konserî ameyê xemilnayene.
Demê zerrîzîzî qewimîyayê
Endamê Koma Amedî ke ameyê teyarageyê Amedî hetê Hemşaredaranê Peyasî Bêrîvan Gulşen Sîncar û Cengîz Dundar, endam û rayberanê sazgeyanê kultur û xeylê kesan ra bi girseyî û çîçegan ameyê pêşwazîkerdene. Endamê kome yê ke bi girseyî û coş ameyê pêşwazîkerdene, nêeşkayê hesiranê çimanê xo bitepişê û keyfweşîya xo îfade kerde.
‘Ma zaf keyfweş ê ke Amed de yê’
Endamê kome Suleyman Çarnewa qisey kerd û dîyar kerd ke ê hêvî kenê ke heme hunermendê Kurdîstanî bêrê tîya û vat: “Ma zaf keyfweş ê ke 30 serran ra pey ameyê Amed. Ma her kesî rê zaf sipas kenê. Aştî û azadîye na ya.”
Zîyaretê înan do dewam bikerê
Pêşwazîkerdişî ra pey endamê kome vîyartê Şaredarîya Amedî ya Şaristanê Girdî. Endamê kome dima ra do Şaredarîya Peyasî zîyaret bikerê û şan de zî do Amedstoreya nêzdîyê stadyumî de formayanê Amedsporî îmza bikerê.
