Derheqê rojnameger Abdurrahman Gokî de, bi îfadeyanê şahîdê nimiteyî yê bi kodnameyê “K8Ç4B3L1T5” îdîanameyêko newe ame amadekerdene. Şahîdê nimiteyî beyanê xo de seba Gokî va: “O kes o yo ke wexto ke Kemal Kurkut hetê hêzanê ewlekarîye ra ame kiştişî, fotografê ey ant.”
Serekdozgerîya Komare ya Amedî, derheqê rojnameger Abdurrahman Gokî de bi îdîaya “endamîya rêxistine” bi waştişê yewkerdişî îdîanameyêko newe amade kerd. Îdîanameyo ke paştîya xo dano îfadeyanê şahîdê nimiteyî “K8Ç4B3L1T5” ê 18ê Teşrîna Verêne 2022î ke verê cû derheqê xeylêk rojnamegeran de îfadeyî dabî, tede yeno îdîakerdene ke Gok “Komîteya Çapemenîye ya KCK’î” de “sewîyeya mesulîyetî” de ca girewto.
Şahîdê nimiteyî “K8Ç4B3L1T5” îfadeyê xo de ke îdîaname de ca girewto, va ke Gok ziwananê Îngilîzkî, Fransizkî, Almankî, Erebkî û Farskî zano. Şahîdê nimiteyî ard ziwan ke wexto ke DAIŞ hêrişê Kobanê kerdo, Gok şîyo herême û xeberê ke viraştê “goreyê îdeolojîya rêxistine” viraştê. Şahîdê nimiteyî îfadeyê xo yê îdîanameyî de pawit ke tewrbîyayîşê Gokî yê eşkerayîyanê seba rojnamegeranê tepişteyan û qiseykerdişê ey seba paştîdayîşî bi sifetê “temsîlkarîya rêxistine” kerdo û va: “Kombîyayîş û eşkerayîyanê çapemenîye yê ke seba rojnamegeranê tepişteyan yenê kerdene de sey temsîlkarî qiseyan keno.”
Şahîdê nimiteyî îdîa kerd ke Gokî serê nameyê rêxistine de herêmanê cîyayan ê Tirkîya de ajansan rê nuşteyî nuştê û talîmatî dayê û na îdîa de bi: “Eke ez nimûneyan bida talîmatanê ey, ez zana ke talîmatî dayê ke rojê muhîmî yê eleqedarê Ocalanî sey 15ê Sibate, 9ê Citmenge de nuşteyî bêrê nuştene.”
‘Kiştişê Kurkutî bi fotograf anto’
Îdîaname de, ca dîya fotografkerdişê Gokî yê wextê qetilkerdişê wendekarê unîversîte Kemal Kurkutî ke Newroza Amedî ya 2017î de hetê polîsan ra ame qetilkerdene. Îdîaname de, fotografkerdişê qetilkerdişê Kemal Kurkutî sey beyanê “şahîdê nimiteyî” ca girewt.
Îdîanameyo ke tede fotografê ke xeylêk xelatî girewtê sey “zanayîşêko nimite yo ke nêno zanayene” ame pêşkêşkerdene, fotografê qetilkerdişê Kemal Kurkutî sey “bestîyayîşê rêxistinî” ame şîrovekerdene. Verê cû tewr verî şahîdê nimiteyî “Sabir”î zî mîyan de, şahîdanê nimiteyan ê ke vera Gokî de beyanî dabî, beyan kerdbi ke Gokî fotografê qetilkerdişê Kurkutî anto, eynî beyanê ke hetê şahîdê nimiteyî “K8Ç4B3L1T5″î ra ameyo dayene bala ante û îdîaname de qetilkerdişê Kurkutî bi îfadeyê “bêtesîrkerdişî” ame vatiş.
Îdîaname de no hal bi nê îfadeyan ame nuştene: “‘…O kes o yo ke şayîyanê Newroze yê ke 2017 de Amed de ameyî kerdene de, wexto ke Kemal Kurkut hetê hêzanê ewlekarîye ra ame bêtesîrkerdene, fotografê ey anto…’ bi şeklê nê qiseyan eşkera biyo ke derheqê bestîyayîşê organîkî yê gumanbarî bi rêxistina terorî ya çekdare ya PKK/KCK de beyanê xo dayo.”
Îdîanameyê ke bi talebê yewkerdişî amade bibi, hetê Mehkemeya Cezaya Girane ya 5. ya Amedî ra ame qebûlkerdene û bi dosyaya ke Gok tede bi îdîayanê “endamîya rêxistine” û “propagandaya rêxistine kerdene” ra yeno muhakemekerdene, ame yewkerdene. Roniştişê dewaya ke Gok tede yeno muhakemekerdene zî do 25ê Citmenge de bêro vînayene.
