Heyetê Weşanayîşî yê Kovara Jîneolojîye û DFG’yî, Nagîhane Akarsel ke endama Merkezê Cigêrayîşê Jîneolojîye û rojnameger bîye û hetê dewleta tirke ra ameye qetilkerdene, yad kerd û adalet waşt.
Komela Rojnamegeranê Dîcle-Firatî (DFG) bi munasebetê serrgêra qetilkerdişê Nagîhane Akarsel de îzahatêk da. Nagîhane Akarsel ke endama Merkezê Cigêrayîşê Jîneolojîye û rojnameger bîye, 4ê teşrîna verêne 2022î de bajare Silêmanîye yê Başûrê Kurdîstanî de ameybî qetilkerdene.
Îzahatê DFG’yî de wina ame vatene: “Ma newe ra talebê xo yê ke hêzê piştîdayoxê kiştoxanê Nagîhane bêra eşkerakerdiş û muhakemakerdiş, îfade kenê. Kiştoxê Nagîhane ganî bizanê ke ne çapemenîya azade bi qetilkerdişan yena wêrankerdene ne zî hetê nuştişê raştîye ra gamêk peyser yena eştene. Nagîhane bi nuşteyanê xo û têkoşînê xo, zerrîya cinîyan û rojnamegeran de zerrîya şaranê dinya de ciwîyena. Ma newe ra soz danê ke ma bi nuşteyanê Nagîhane xo rê sey mamosta esas gênê, têkoşînê aye şaranê dinya ra vila bikerê.”
Heyetê Weşanayîşî yê Kovara Jîneolojîye zî bi îzahatêk Nagîhane Akarsel yad kerd. Îzahatî de vat: “Qetilkerdişê aye seba heme cinîyanê dinya zîyanêko girs bî labelê estbîyayîşê aye seba însanîye şansêk û sebabêkê şerefî bî. Aye vatbî ‘Xeyalê mi, mizgînîyê rayîranê min ê ke ez do şêra.’ Xeyalê to, bi milanê cinîyan ser o û zerrîyan de mizgînî dano û dewam keno ke rayîran akero, Nagîhana ezîze. Têkoşînê to ke heme erjanê însanîye zerrîya xo de hewêneno, do bibo sebebê têkoşînê ma. Ma bi yew hesretê bêpeynîye embaza Nagîhane newe ra yad kenê û soz danê ke ma do têkoşînê aye biresnê serkewtişî.”
