Arnavutîye de kabîneya newîye ameye eşkerakerdene ke mîyanê ci de Wezîra mesûla Îhaleyanê Raya Pêroyî Diella (Aqila Sunî-Yapay Zeka) zî ca gêna. Aqila Sunî Diella, welat de verê cû xizmetanê raya pêroyî de sey asîstana dîjîtale wezîfe kerdene.
Serekwezîrê Arnavutîye Edî Rama, civînê Meclîsê Neteweyî yê Partîya Sosyalîste de ke serekîya ci keno, kabîneya ke do weçînayîşanê pêroyî yê 11ê Gulane ra dima dest bi kar bikera, eşkera kerde.
Pawîyeno ke kabîneya newîye ya ke hetê Serekwezîr Rama ra ameye eşkerakerdene, rojanê vernî de bêra reydene û dest bi kar bikera.
Wezîra aqilê sunî
Serekwezîr Rama va ke înan aqila sunî Diella sey Wezîra mesûla Îhaleyanê Raya Pêroyî tayîn kerda. Diella verê cû welat de xizmetanê raya pêroyî de sey asîstana dîjîtale kar kerdene.
Rama da zanayene ke Diella, semedê kêmkerdişê rantwerîye viraşteya aqila sunî ya “virtual afirnaye” ya tewr verên a ke îhaleyanê raya pêroyî ra mesûl a.
Diella ke nameyê ci Arnavutîye de manaya “tije” (roj) de yo, aşma çeleyî ra nata portalê dewlete yê e-Arnavutîye ser o şuxulnayoxan rê xizmeta şêwirmendîye dana û semedê ke welatîyî bikarê qasê %95ê xizmetan rê bi hawayêkê dîjîtalî biresê, pêro muameleyanê burokratîkan de bi fermananê vengînan înan rê hetkarî kena.
Gelo do seba meseleya rantwerîye bibo çareserî?
Eksperî vanê ke Arnavutîye seba çeteyanê mîyanneteweyîyan ê ke wazenê pereyê qeçaxçîtîya tiryak û çekan pak bikerê, merkezêk a û rantwerîye heta qedemeyanê tewr corênan ê hukmatî vila bîya.
Medyaya Arnavutîye na game zaf balkêş pênase kena û vana ke: “Hukmatê Arnavutîye hawayê destvistene û şuxulnayîşê hêzê îdarî de yew bedilîyayîşêko pîl keno û teknolojîyî ne tenîya sey hacetêk, eynî wext de sey beşdarêka aktîfe ya îdareyî pêşkêş keno.”
