Bi hezaran welatijî vera talanê xoza rayra şîyê. Hemserekê DBP’yî Keskîn Bayindirî qiseykerdişê xo de vat ke prosesêkê aştî est o û ganî dewlete xozaya ma reyde aştî bikera.
Hemsereka Pêroyî ya DEM Partî Tulay Hatîmogullari, Hemserekê DBP’yî yê Pêroyî Çîgdem Kiliçgun Uçar û Keskîn Bayindir, Hemverfeka Înîsîyatîfê Yewîye Gulcan Kaçmaz Sayyîgît, Hemserekê Pêroyî yê SYKP’yî Mertcan Tîtîz, Hemverfeka Partîya Çep a Kesk Dîdem Goçer, xeylê parlamenterê DEM Partî, rêxistinê DEM Partî û DBP’yî yê şaristananê Amed, Sêrt, Mardîn, Riha, Êlih û Şirnexî, endamê têgêrayîşanê ekolojî yê herême û bi hezaran welatijê ke Qada Cumhurîyetî de kom bîyê, bi pankartanê ‘Talan û rant cuya ma qir keno, ma do cuye bipawê’, ‘Nobedarê dara gozî yê, ma tîya de yê’ û bi sloganê, ‘Bê xoza cuye nêbena’ heta Qada Qehweyê Emero Ereb rayra şîyê.
‘Hêrişê xoza û cuya Şirnexî kenê’
Dima ke girse resa Qada Qehweyê Emerê Ereb seba qehremananê azadîye deqeyêk rêze girewte. Rêzgirewtişî ra pey Endama Têgêrayîşê Ekolojî yê Mezopotamyayî Derya Akyol eşkerayî wende. Akyol vat: “Ma ewro seba ke vernîya qirkerdişê xoza bigîrê Botan ameyê têhet. Serramê 90an de bi vengkerdişê dewan û hêrişanê şaristanan ser o hêrişê şarê ma kerdêne. Ewro zî nê kerdişanê 90î ra reyde xozaya ma talan kenê. Çar hetan ra hêrişê xozaya Şirnexî kenê û no hêriş tena xoza reyde girêdaye nîyo, eynê wextî de hêrişê cu û kulturê Şirnexî zî kenê. Ma do êdî seba ke darêk zî nêra birnayene, vera nê polîtîkayan vindenê. Ma veng danê rayedaranê dewlete le nê polîtîkayan ra fek verado. Seke Rayberê Şarê Kurdî Abdullah Ocalan vato, ‘Kesê ke xoza reyde aştî nêkerê, nêeşkenê merdiman reyde bikerê.”
‘Sîyasetê îşxalkerîye Şirnex de kenê’
Eşkerayî ra pey Hemserekê Pêroyî yê DBP’yî Keskîn Bayindirî qisey kerd û bale ant prosesê aştî ser o û wina vat: “Ez xoverdayîşê şima bi hezaran reyî silam kena. Sebeb û amancê nê xoverdayîşî ma est o. Bi serran o ma hemverê hêrişanê xozaya xo ser o, xover danê. Ma zanê ke demo ke babete bena xozaya Kurdîstanî dewlete senî nêzdî bena. Demo ke daristanê ma veşenê teyarêka awe çin a. La demo ke seba şerî bo bi seyan teyareyî Kurdîstan de gêrenê. Sîyasetê îşxalkerîye Botan de yeno kerdene. No sîyasetê talanî yo. Bi hewayêkê dişmentî nêzdîyê xoza benê. Hêrişê vera xoza hêrişê vera ziwan û kulturê ma yo. Prosesê aştî dewam keno. Nê reyde girêdayey ganî ewil xozaya ma, çemê ma, koyanê ma û daristananê ma reyde aştî bikerê.”
Qiseyekerdişan ra pey girse seba nobete verê xo da Herêma Besta.
