Verfeka DEM Partî Ayşegul Dogan eşkera kerd ke Rayberê Şarê Kurdî Abdullah Ocalanî komîsyonî ra ke Meclîsî de meseleya kurdî ser o ameyo ronayene, vato; “Çîyê muhîmî est ê ke ez vaja.”
Verfeka DEM Partî Ayşegul Dogan, derheqê kombîyayîşê MYK’yî de ke 8ê êlûle de ameya viraştene, konferansêkê çapemenîye viraşte.
“Qeyûm xirabî yo”
Dogan reaksîyon mojna seba tayînkerdişê qeyûmî yê Serekîya Şaristanî ya CHP’yî ya Îstanbulî û vat: “Rewşêka bêhuqûqî reyde rî bi rî yê. Qeyûm xirabî yo, wêrankerdiş o. Vera betalkerdişê kongreyê şaristanî dewa nêyena akerdiş; na babete munaqeşa rê giredeye ya. Coka qeraro ke ameyo girewtene ne huqûqî yo ne zî meşrû yo.”
“Mesele tena yê CHPyî nîya”
Dogan îfade kerd ke mesele tena yê CHP’yî nîya: “Mesele meseleya demokrasîya Tirkîya ya. Ma mesele reyde wina eleqedar benê. Seba ney ma vera vindertê. Ma vera têkoşîn danê. No bi vatişanê ‘CHP’yî pawitiş yan nêpawitiş’ nêeşkeno bêro tesbîtkerdene.”
“Formulê têdîyayîşê Ocalanî ganî bêro dîyene”
“Komîsyon ganî formulê têdîyayîşê Birêz Ocalanî bivîno. No hewcedarîyêk o û ganî bibo. Yanî eke ti wazenî cigêrayîşê çareserîye, cigêrayîşê aştîye xo sîyasetêko tebîî de ca bigîrê, ganî ti lîderêkî rê rayîr akerî ke bi desan serran nê warî de xebitîyayo û wazeno nê zemînî awan bikero, bi hawayêko biserûber têkoşîn dano ke zemînêkê sîyasî de zemînêkê huqûqî de bibo çareser.”
“Heqê hêvî”
Dogan vatişê Serekê MHP’yî Devlet Bahçelîyî yê “Wa bêro Meclîsî de qisey bikero, heqê hêvî bêro dayene” ard vîrardene û vat yew serre nê vatişan ser o vîyarto labelê hema mesele hal nêbîya.
Heyetê DEM Partî do şêro Îmrali
Dogan îlawe kerd ke heyetêkê partî ke tede Hemserekê Pêroyî Tulay Hatîmogullarî û Tuncer Bakirhan zî est ê, hewteyê ameyoxî de do şêro zîyaretê Rayberê Şarê Kurdî Abdullah Ocalanî.
“Rayberîya Vakur û Rojhelatê Sûrîye reyde ganî têdîyayîş bibo”
Dogan reaksîyon da tehdîdanê vera Vakur û Rojhelatê Sûrîye û va: “Ma tim derheqê YPG, PYD û SDG’yî de beyanatan vînenê. Destkewteyê kurdan sey tehdîd yenê mojnayene. Ganî fek naye ra bêro veradayene. No ziwan ziwanê dostîye nîyo. No ziwan ziwanê cigêrayîşê çareserîye nîyo. Rayberîya Tirkîya ganî Rayberîya Vakur û Rojhelatê Sûrîye reyde têdîyayîş bikera.”
“Varyantê operasyonî ganî masa de nêbê”
Dogan vat ke ê nêwazenê îhtîmalê hêrîşê vera Vakur û Rojhelatê Sûrîye munaqeşa zî bikerê: “No varyant ganî nêro vatene zî. Tu masa de ganî no varyant ca nêgîro. Eke masa ronaya, ganî varyantê dostîye ser o bibê, varyantê çareserîye bo, varyantê operasyonî nêbo.”
