DFG’î rojnamegerê şehîdî yê aşma tebaxe ser o beyanato nuştekî da. DFG’î dîyar kerd ke serra 1990’î de zafê endamê çapemenîyê azadî ameyî remnayîş û kiştiş. Nê rojnamegeran yew zî rojnameger Sayfettîn Tepe yo. Sayfettîn, dima ke birazayê ey û nûçegîhanê rojnameyê Ozgur Gundemî Ferhat Tepe, 28’ê Temmuza 1993’yî de Bedlîs de amey remnayîş û kiştiş, ey zî karê rojnamegerîye de cayê xo girewt.
Komeleya Rojnamegeran ê Dîcle Firatî (DFG) rojnamegerê şehîdî yê aşma tebaxe ser o beyanato nuştekî da.
Beyanatê DFG’î wina yo:
“Sayfettîn Tepe 25’ê Tebaxa 1995’î de Êlîh de ame destbendkerdiş û uca ra berdî Mîdîrîyetê Polîsan ê Bedlîsî. Polîsan va ke Sayfettîn Tepe xo kişto, labelê keyeyê ey va ke Tepe binê destbendkerdişî de ameyo kiştiş. Sayfettîn Tepe datzayê Ferhat Tepe yê ke nûçegîhanê Bedlîsî yê Rojnameyê Ozgur Gundemî yo ke 28’ê Temmuza 1993’yî de ameyo remînayîş û kiştiş. Tepe, serranê 1990’an de seba ke zafê dosyayê nimiteyî weşanayî, hetê polîsan ra bîyo hedef. Tepe, Îlona 1993’yî de Edene û Dîlok de nûçegîhanê rojnameyê Ozgur Gundemî bi. Wextê ke ameyo kiştiş, Êlîh de nûçegîhanê Yenî Politikayî bi. Keyeyê ey serrda 1996’î de serî da Mehkemaya Heqanê Merdiman a Ewropa (DMME). DMME’yî serlêdanê keyeyî 20’ê Adare 1996’î de qebûl kerdo, labelê 13’ê Nîsana 2004’î de red kerdo. 26 serrî yo ke kiştoxê Sayfettîn Tepe nêameyo vînayîş û cezakerdiş.
Mehmet Şenol zî yew ji rojnamegeranê ke na dewrê tarî de ameyo kiştiş. Ey buroyê kovara “Ber bi 2000’an ve (2000’e Dogru)” ya Amedî de dest bi rojnamegerîye kerdo. Mehmet Şenol hemnanê 1991’î de beşdarî karê Yenî Ulkeyî bi. Dima ke Hafiz Akdemir ameyo kiştiş, Mehmet Şenol ke vera vengê rayîrberîyê Ozgur Gundemî yê “aramîye” vejîyayî, seba yew demî buroyê Wanî rê ameyo erşawitiş. Dima ra ameyo Amed û uca de ameyo girewtiş. Mehmet Şenol rojnamegero yewin o ke bikaranîyayîşê Hîzbûllahî yê hetê JÎTEMî ra eşkera kerdo. Xeberanê ke ey viraşto de ey, raştîyê ke kontr-gerîlla binê banê Hîzbûllahî de xo rêxistin kenê, bi yew vîyînayîşê Huseyîn Velîoglu eşkera kerdo. Şenol, xeberê ke weşanayî, serkêşê buroyê Amedî yê Kovara “Ber bi 2000’an ve” Halît Gungen rê pêşkêş kerdo. Xebere 16’ê Sibata 1992’yî de kovara “Ber bi 2000an ve” de bi sernameyê “Hîzbûllah merkezê Hêza Çevîkê de perwerde beno” ameyo weşanayîş. 30’ê Tebaxa 1994’î de dema ke bi 10 embazanê xo ra mîyanê Hezro û Pasûrî de ber bi koyan ve şiyêne, nezdîyê dewa Rêşaneyî de ameyo kiştiş.
Yew ji rojnamegeranê ke aşma Tebaxe de ameyo kiştiş, vilakerdoxê rojnameyan Hidir Çelîk bi. Çelîk, ke 23’yê Tebaxa 1994’î de ameyo kiştiş, vilakerdoxê Rojnameyê Ozgur Ulkeyî bi.
Sey Komeleya Rojnamegeran ê Dîcle Firatî ma do paştî bidî têkoşînê rojnamegeranê ke cuyaya xo seba raştîye feda kerdî. Heta ke raştî tarîtî de nêmanê, ma do hetanî peynî şopdarê dozê înan bîbî.”
