Endamanê komîsyonî yê Partîya DEMî, derheqê di kombîyayîşanê peyênan de beyanat da û va: “Pêro pêşkêşî yê ke ma seranserê di rojan goşdarî kerdî, reyêna baro giran ê vîyarteyî ard ma vîrî.”
Endamê Partîya DEMî (Partîya Demokrasî û Têduştîya Şaran) yê Komîsyonê Piştîdayîşê Neteweyî, Wayûbiratîye û Demokrasî yo ke Meclîs de ameyo ronayene beyanat da. Endamanê Komîsyonî ra Gulîstan Kiliç Koçyîgît, Meral Daniş Beştaş, Hakki Saruhan Oluç, Celal Firat û Cengîz Çîçekî, derheqê di kombîyayîşanê peyênan ê ke mîyanê tarîxanê 19 û 20 Tebaxe de ameyî kerdene de beyanatêko nuştekî da.
Beyanat de nê çî ameyî îfade kerdene: “Komîsyonê Piştîdayîşê Neteweyî, wayûbiratîye û Demokrasî kombîyayîşê xo yê çarin û pancinî temam kerdî. Kes û sazîyê ke bi mutebaqatê partîyanê sîyasî yê ke komîsyon de temsîlîyetê înan est o, ameyî tesbît kerdene, seranserê di rojan ameyî goşdarî kerdene. Verê verkan , çi înanê ke derd û mexdûrîyetê xo yê ke ciwîyayê bi hawayêko eşkera ma de pare kerdê, çi zî înanê ke rexne, vîzyon û pêşnîyazê xo ardê ziwan, pêro kes, derûdor û sazîyan rê bi nameyê partîya xo sipas kenîme.
Her ciwîyayîş, her tespît û pêşnîyaz yew perçeyê nê fotografî bîy
Qiseykerdişan de, ma eşkenîme vajîme ke sere de vîndî kerdişî canan, tesîrê komelkî, sîyasî û ekonomîkî yê serranê ke meseleya Kurdî zemînê şerî de seyr kerdêne, sey yew fotograf ame verê ma. Her hîkaye, her ciwîyayîş, her tespît û pêşnîyaz yew perçeyê nê fotografî bîy.
Herçiqas ke sebeb, bingeh û pênasê kes û sazîyanê ke vîzyonanê sîyasî, beşanê komelkî yê cîya-cîyayan temsil kenê, hîs û pêşnîyazê înanê ke komîsyon de pare kerdê ferqan nîşan bidê zî, prosesê mevcutî rê piştîdayîşê înan û seba ke proses serkewte bibo temennîyê înan, zaf bierj bî.
Bêguman, ma hişyarê ferqanê mîyanê vîzyonan û pêşnîyazanê înan îme. La ma ferq kenîme ke piştî bi prosesî dayîşê kes û sazîyanê ke ma goşdarî kerdî, yew wezîfeyê tarîxî nano milê sazgehê sîyasetî ser. Vera fereseto ke mîyanê dejan de hîyararşî nano ro, dejan yewbînan de erzeno têver, ma rolê polîtîka yê halkerdişê meseleyanê komelkî reyna anîme xo vîr û wazenîme bîyarîme merdiman vîrî zî.
Ma giranîya nê barî hîs kenîme
Pêro pêşkêşî yê ke ma seranserê di rojan goşdarî kerdî, reyêna baro giran ê vîyarteyî ard ma vîrî. Ma giranîya nê barî hîs kenîme û seba ke nê barî azanê ameyoxan rê meverdîme, ma ê qerar de yîme ke destabera ma ra çi êno ma do seranserê falîyetanê komîsyonî de bikerîme.
Na çarçewe de, ma biqerar vera pêro cehdkerdişan ê ke wazenê teber a bi zûr û provokasyonan xebatanê komîsyonî sabote bikerê, meşrûîyeto ke komel de aver şino xirab bikerê, gamê ke verbi haştî û çareyê demokratîk yê meseleya Kurdan ênê eştene asteng bikerê.
