HTŞ, ciwananê kurdan ê Qamişlo û Îdlibî ra hetê Efrînî ser erşeweno û binê nameyê hêzanê “Asayîşê Herêmî” de Taburê Kurdan o ke MÎT paştî dano ci, hîra keno.
Demo vîyarte de Efrîn de Taburê Kurdan ke bi paştdayîşê MÎT’î binê nameyê hêzanê “Asayîşê Herêmî” de ameybî awankerdene, goreyê xebera lekolin.orgî MÎT wazeno nê taburî hîra bikero û seba na yewî zî ciwanê qamişloyîjî ke Îdlib de beşdarî refanê HTŞ’î keno.
Yew gruba ciwananê kurdan a Qamişloyî ke girêdayeyê Mesut Betalî ya, Îdlib de tewrê refanê HTŞ’î bena û dima ra Îdlib ra yena erşawitêne Efrîn. Yeno plankerdene ke seba tewrbîyayîşê na grube bi hêzanê “Asayîşê Herêmî” yê Efrînî firsend bêro viraştêne. Bi nê hawayî, demo ameyox de seba tewrbîyayîşê ciwananê Efrînî zemîn do amade bibo.
Koordînasyonê HTŞ û ENKS’î
No aktîvîte parçeyê yew planê hîraye yo ke bi organîzekerdişê MÎT’î û bi koordînasyonê HTŞ û ENKS’î yeno rayîrberdene û sereyê nê prosesî de Mesud Betalo ke mîyanê HTŞ’î de mesul o, ca gêno. Embazê ey ê Ebû Ducane El-Kurdî (Şadî Mîşo) yo ke verê cû grubanê sey DAIŞ û El-Hemzatî de faelîyet kerdo û paştgîrê ey Azad Mîr’î El-Şabû kerdêne. Verê cû Mesud Betalî, sey yew mesuldarê kurdî yo ke mîyanê HTŞ’î de yo, Ebû Ducane El-Kurdî reyde û goreyê talîmatanê MÎT’î, seba awankerdişê yew Taburê Kurdan ê Efrînî dest bi faelîyetan kerdbi. Nê fealîyetanê xo bi paştdayîşê MÎT’î, bi hedefê hîrakerdişê taburî û bi şuxulnayîşê ciwananê kurdan dewam keno.
Planê MÎT’î yo
Mesud Betal, dewanê Efrînî de bi pêşengê keyeyan û temsîlkaranê eşîretan reyde pêvînayîşan keno û xebitîyeno ke bi teşwîkanê madîyan awanîyanê herêmîyan sey eşîreta Dîdanî teyê nê prosesî bikero. Mesud Betal, sey yew nameyo ke mîyanê HTŞ’î de mesul o, nê prosesî îdare keno. Ebû Ducane El-Kurdî û hetkarê ey Azad Mîr’î El-Şabû zî awankerdişê nê taburî de rolêko aktîf kay kerdêne. No taburo ke yeno awankerdene, sey yew hêzê kurdan o çekdar yeno plankerdene ke do paralelê grubanê çeteyan ê estbîyayêne yê Efrînî de, girêdayeyê MÎT’î bo û goreyê perspektîfê ey hereket bikero. No aktîvîte yeno no mana ke hêzê Asayîşê Herêmî bi nasnameyê kurdan bêrê meşrûkerdene û demo ameyox de hîna zaf ciwanê kurdî tewrê na awanîye bibê, zemîn bêro amadekerdene.
Planê MÎT’î yo newe di beşan ra yeno meydan; keyeyanê Kurdan rê erşawitişê yew pêroyîname (genelge) û seba agêrayîşê kesanê ke bi zorî cayanê xo ra ameyê kerdêne, akerdişê beranê vîyartişî yê Efrînî. Her çiqas sebebo ke aseno ‘temînkerdişê agêrayîşê koçberan’ bo zî, yeno vatene ke hedefo esas astengkerdişê dekewtişê partî û hêzanê kurdan ê muxalîfan ê Efrînî û vurnayîşê awanîya demografîkî ya herêmî bi hetê îşxalê Tirkîya yo.
