Xebatkarê Perî Tekstîlî yê ke vera vetîşê karî de dest bi çalakîye kerd, dîyar kerdî ke heta ke heqanê xo dest bivisnî, ma do têkoşîn bidî û agêrî serê karê xo.
Dêrsim de, şîrketa Perî Tekstîlî 24ê Temuze de 17 kesî ke zafê înan cinî bî, seba nerazîbîyayîşê înan ê vera mobbîng û heqaretî kar ra vetî. Karkerê ke endamê BÎRTEK-SEN’î yê, dest bi çalakîye kerdî û waştişê heqê xebata sendîkayî, qedînayîşê mobbîngî yê kargehî de, dayîşê maeşanê zêdeyan, betleneya serrane ya ke bi serran o kar nêardî, qedînayîşê xebata zêde û zextî û agêrayîşê serê karê xo kerdî. Çalakîya ke roja çarine de dewam kena, xebatkaran va ke heta ke heqanê xo dest nêvisnî, ê do çalakîya xo dewam bikerî.
Waştişê xebatkaran
Meral Guzel ke panc serrî yo şîrkete de sey utîvan xebitîyaye û dima ke kar ra ameye vetîş beşdarê çalakîye bîye, va ke înan verê cû kargehî de zaf problemî dîyî.
Meral Guzelî ard ziwan ke seba ke karê xo vînî nêkerî, ê bêveng mendî, labelê dima nerazîbîyayîşî kar ra ameyî eştiş û wina va: “Ma 17 kesî yî û waştişê ma nê yê; ganî heqê ma bêrî dayene û ma endamê sendîkayî yî û ganî heqê ma yê sendîkayî bêro şinasnayîş. Karker sendîkayî qebul nêkeno. Ne sendîkayî qebul keno ne zî wazeno karkerê sendîkayî bixebitno. Ma do xoverdayîşê xo dewam bikerî heta ke waştişê ma bêrî ca ardiş.”
Evrîm Altinkaynakî zî dîyar kerd ke heta ke heqanê xo dest bivisnî û agêrî serê karî ma do têkoşîn bidî.
