Bi talîmatê Wezaretê Perwerdeyê Neteweyî û Walîyîya Îzmîrî, Şaredarîya Konakî berê Komeleya Avesteyî mohr kerdbî. Babete ser o Komeleya Avesteyî eşkerayêka nuştekî da û va ke nê bi rayîrê gef û tûndîye, gorê prensîbanê adaletî hereket bikerî.
Bi talîmatê Wezaretê Perwerdeyê Neteweyî û Walîyîya Îzmîrî, hîrê roje verê cû zî polîsan eştîbî komele ser û bi bexaneya ke ruhsatê komele çin o gefê girewtiş û mohrkerdişî wendîbî. Vîzîr zî saetanê sersibayî de 2 zabitayî ameyî komele û komele mohr kerd.
Ma zî sey Ajansa Welat na mesele ardbî rojeve. Xebera ma ra pey nê nêzdîbîyayîşê Şaredarîya Konakî, Walîyîya Îzmîrî rê Komela Cigêrayîşanê Kultur û Ziwanî ya Avestayî bi eşkareya nuştekî bertek nîşan da.
Eşkeraya Komela Avestayî wina yo:
“Komela Cigêrayîşanê Kultur û Ziwanî ya Avesta serra 2018 de Îzmîr de ameye ronayîş û bi hawayêkê qanûnî û şeffaf cigêrayîşan serê Kurdkî de kena û perwerdeyîşê ziwanê Kurdkî dana.
Di nê demî de ke prosesê dîyalog û aşîtîye yeno kerdene û hêvîyê aşîtîye zêde bîyî, mixabin komela ma rastê gefanê bêbingehî û nêqanûnî yena. Di rojan verî polîsan bi behaneyê ke “ruhsatê komele çin o” gefê; girewtiş û mohrkerdişî ma ser o werdî. Û dima zî hetê zabitayanê Şaredarîya Konakî ra berê Komela ma ame mohrkerdiş.
Ma bi hawayêkê eşkera vanî:
Ruhsatê fermî yê Komela Cigêrayîşanê Kultur û Ziwanî ya Avesta est o. Heta nika bi se ra wendekaran dersanê ma yê ziwanê Kurdkî ra îstîfade kerdî. Xebatê ma hem bi hawayêkê rî bi rî hem zî online dewam kenî.
Ma rayedaran ra wazenî:
Hurmetê qanûnan bikerî û gorê qanûn û zagonanê mîyanneteweyî hereket bikerî. Heqê perwerdeyê ziwanê dayîke heqêko bingehîn o. Gefî û tûndîyê vera komelanê çandî gereke bêrî vindarnayîş. Seba averşîyayîşê cemaatî gereke azadîya çandî bêra pawitiş. Ma hemî welatîyanê demokratan, rêxistinanê heqanê merdiman, çapemenî û hereketanê sîvîlan ra vanî:
Vera nê gefanê nêqanûnî vengê xo berz bikerî. Piştgirîya komelanê kulturî bibê. Seba pawitişê heqê perwerdeyê ziwanê dayîke, ma dir mîyanê hembarî de bibê. Komela Kultur û Ziwanî ya Avestayî do serê rayîrê xo yê qanûnî de dewam bikera û qet xebatanê xo yê çandî û perwerdeyîşî ra nêagêra. Ma hêvî kenî ke hêzê fermî bi rayîrê dîyalog û hembarîye pirsgirêkan çareser bikerî, nê bi rayîrê gef û tûndîye. Ma vengê hemî hetanê ke elaqedar î kenî ke gorê prensîbanê yewsanî, adalet û azadîye hereket bikerî.
Biciwo Ziwanê Kurdkî, Biciwo Aşîtî û Azadî!
Komela Çand û Ziwanî ya Avestayî”
