Beşdaranê cinîyan ê perwerdeyê Weqfa Ziwanê Kurdkî yê Reqa de îzeh kerd ke ziwan semedê neslanê amayoxî zaf muhîm o û veng da heme cinîyanê Vakur û Rojhelatê Sûrîye ke tewrê perwerdeyî bibê.
Rêxistina Perwerdeyî ya Vakur û Rojhelatê Sûrîye, 15ê Gulane Roja Ziwanê Kurdkî de, herême de Dezgehê Ziwanê Kurdkî yo yewin akerd. Enstîtu, akerdişê xo ra aşmêke dima dest bi perwerdeyê xo yo yewinî kerd. Enstîtuya Ziwanê Kurdkî, sewîyeya destpêkî ra heta sewîyeya averşîyaye, qiseykerdiş û nuştişê Kurdkî de hîrê sewîyeyanê perwerdeyî teqdîm kena. Na dewre de ke pêro pîya nezîkê 45 beşdarî est ê, seba beşdaranê camêrd û cinîyan programê perwerdeyî yenê organîzekerdene ke hem seba cinîyanê keyeyî hem zî seba cinîyanê karkeran ê.
Kulturê yewbînan rê giredayeyî
Evîn Elî ke raybera Weqfa Ziwanê Kurdkî ya, derheqê armancê dezgehî de JINHA’yî rê qisey kerd. Evîne dîyar kerd ke ê xebitîyenê ke tenê seba şarê ke Kurdkî qisey kenê nê, seba heme qismanê herême ray abikerê ke wa kurdkî bimusê û înan rê pisporîye û hunerê kulturî û perwerdeyî peyda bikerê.
Evîne dîyar kerd ke no seba cinîyanê ke bi qiseykerdişê tewr tay yew ziwanî sewîyeya xo ya kulturî û perwerdeyî aver benê, komelî ver bi serfirazîye benê, raştîya komelî hîna weş kenê û famê cuyayîşê pîyayî vila kenê, gameyêka pozîtîf û muhîm a.
Seba cinîyan di roniştişê cîyayî
Evîne da zanayene ke şert û mercê cinîyanê ke teberê keyeyî de xebitîyenê, ameyê çim ver girewtene û Weqfa Ziwanê Kurdkî perwerdeyê xo goreyê nê bi hawayê di roniştişan viraşto. Evîne nê agahîyî dayî: “Tenê yew ferq estbi, o zî wext bi. Roniştişê siba seba cinîyanê keyeyî bî û roniştişê şanî zî seba cinîyanê ke teber de xebitîyenê û wanenê bî.”
‘Goreyê puanan sertîfîka gênê’
Evîn Elî mekanîzmaya perwerdeyî goreyê sewîyeyanê kursîyeran şîrove kerde û wina va: “Sewîyeya yewine, bi musnayîşê herfan û bingeyanê ziwanî, seba kursîyeran zemînê musayîşê ziwanî amade kena. Qaydeyê gramerî û rastnuştişî sewîyeya diyine de yenê îzahkerdene. Eynî wextî de hunerê îrtîbatê profesyonelî sewîyeya hîrêyine de yenê musnayene. Perwerde bi ercîyayîşêkê fekkî û nuştekî yê sewîyeya wendekarî qedîyeno û kursîyer goreyê puananê xo yê îmtîhanî sertîfîka gêno.”
‘Welatijê erebî zî hewl dano ke kurdkî bimusîyo’
Evîne destnîşan kerd ke hûmara beşdaran zêdîyena û xala balkêşe ya perwerdeyî, mozaîkê beşdaran o ke ereban, kurdan û armenîyan ra yeno pê. Evîne va ke no sewîyeya cuyayîşê hemparî ya herême mojneno. Evîne ard ziwan ke unsurê erebî hewl dano ke kurdkî bimusîyo û wina va: “Wazeno ke hîna xorîn fam bikero. Ma xebitîyenê ke herêmanê dewan de kursanê perwerdeyî abikerê ke wa barê resnayîşî ra kesê ke wazenê qeydê xo bikerê, rehet bikerê.”
