Mehmet Denîz Guzelo ke 33 serrî yo hepisxane de yeno girewtene, rixmo ke cezaya ci qedîyaye tehlîyeya ci di reyî ameye taloqkerdene. Birayê ci Emîn Guzelî vera caardişanê hepisxane hêrsê xo îfade kerd û vat: “Huqûq çin o, her çî goreyê keyfê xo kenê.”
Hepisxaneyan de binpaykerdişê heqan dewam kenê. Hepisxaneyê Tîpê F’yî yê Bolu de rixmo ke wextê înfazê înan bîyo de, tehlîyeya 35 kesan hetê Heyetê Îdare û Çimdarî ra ameye taloqkerdene.
Nê tepişteyan ra yew zî Mehmet Denîz Guzelo ke 33 serrî yo hepisxane de yeno girewtene, o yo. Rixmo ke cezaya ci qedîyaye înfazê Guzelî ame veşnayene û tehlîyeya ci di reyî ameye taloqkerdene.
Denîz Guzel 1992î de mabênê Licê û qezaya Darahênî ya Çewlîgî de ame destbendkerdene û 33 serrî yo hepisxane de yo. Guzel verî şawîya Hepisxaneyê Çewlîgî, dima ra Hepisxaneyê Tîpê E’yî yê Amedî rê ame sewqkerdene, uca ra zî Hepisxaneyê Bartinî rê ame sewqkerdene, uca ra şawîya Hepisxaneyê Kandira û 2007î ra nata Hepisxaneyê Tîpê F’ yî yê Bolu de yeno girewtene.
Birayê ci Emîn Guzelî dîyar kerd ke Hepisxaneyê Bolu açarîyayo merkezê îşkenceyî û nê vatî: “Uca nê huqûq ne heqê merdiman est o. Hepisxaneyan de polîtîkaya çokdayîşî yena rayraberdene. Tehlîyeya ci bi sebebê cezaya dîsîplînî yena taloqkerdene la xora nê cezayê dîsîplînî zî bi hewayêko keyfî yenê dayene. Heyetê Hepisxaneyî persanê sey ‘poşman bîyî ya nê, çend kitab wendî, çend awe şuxulnaye, malayî de pêvînayîş kerdo ya nê’ persenê ke nê huqûqî nîyê. Birayê mi reyde cezaya 35 kesan ameye taloqkerdene û tehîlîyeya tayênan 7, 8 heta 9 reyî ameye taloqkerdene. Sere de birêz Ocalan gerek pêro girewteyê sîyasîyî bêrê veradayene. Gerek hinî gamê pêtî bêrê eştene.”
