Wendegehê Sporî yê Hamnanî yê bêpereyî ke Şaredarîya Amedî ya Şaristanê Girdî organîze kena, 11 branşan de bi beşdarîya 5 hezar û 850 gedeyan dest pêkerd.
Wendegehê Sporî yê Hamnanî ke Serekîya Daîreya Xizmetanê Ciwan û Sporî seba gedeyan tetîlê hamnanî de sporî reyde bîyaro têhet û averşîyayîşê înan ê fîzîkî, zekayî û sosyalî rê piştî bido organîze kena, emserr bi beşdarîya 5 hezar û 850 gedeyanê mabênê 7-17 serreyan de dest pêkerd.
Perwerdeyê kursan ke 11 branşan de sey asnawe, futbol, basketbol, voleybol, tenîsê kortî, hentbol, karate, tekwondo, kayê aqil-zekayî, kodkerdişo robotîk û Îngilizkî yenê organîzekerdene, Sumerpark, Sahaya Taxa Yenikoyî, Sahaya Taxa Gokkuşagî, Sahaya Çîmî Numre 1 ya Şaredarîya Amedî ya Şaristanê Girdî, Hewza Akerde ya Seyrantepe TOKÎ, Kompleksê Sporî yê Talaytepeyî, Kortanê Tenîsî yê Girewteyî yê 75î de yenê dayene.
Gedeyan rê piştîdayîşê malzemeyê sporî ame kerdene
Gedeyê ke beşdarê kursanê asnawe benê înan rê verçimik û bone ame dayene, branşanê bînan de zî gedeyan rê piştîdayîşê malzemeyê sporî ame kerdene.
Kursê ke hetê perwerdekaranê warê xo de pisporan ra yenê dayene, do heta 5ê Êlule dewam bikê.
‘Waştişo zaf est o’
Serekê Daîreya Xizmetanê Ciwan û Sporî Baran Yilmazî ke derheqê Wendegehê Sporî yê Hamnanî de melumat da, va ke seba ke kursî weş û berhemdar vîyarê, înan hazirîyê verênî kerdî. Yilmazî wina dewam kerd: “Perwerdekarê ma verê derheqê branşan de heme perwerdeyê xo qedênayî û planê prosesî kerdî ke gedeyan reyde senî hereket bikê, senî perwerde bidê.
Sporkarê bihûnerî yenê keşfkerdene
Yilmazî dîyar kerd ke goreyê hûnerê gedeyan ke beşdarê Wendegehê Sporî yê Hamnanî benê, xebatan kenê û wina dewam kerd: “Perwerdekarê ma kursan de bi kursîyeranê ma yew bi yew eleqedar benê. Ma fikirênê ke gedeyê ma yê ke voleybol, futbol, asnawe, hentbol, kodkerdişo robotîk û heme branşanê ma de hûnerin ê, binawanîya taximanê Şaredarîya Şaristanê Girdî Spor de bigîrê. Perwerdekarê ma nê warî de zî xebatan kenê.”
‘Ma mintiqayanê dewan de aktîvîteyî organîze kerdî’
Yilmazî ard vîr ke gedeyanê mintiqayanê dewan ke nêşênê bêrê kursan, seba înan zî kuçeyan ra aktîvîteyê sporî kenê, va ke wendegeh merkezî ra tever 10 taxanê dewan ê 2 qezayan de ke 7ê ci Sûrî de 3ê ci Kayapinarî de yê, aktîvîteyê sporî organîze kerdî. Yilmazî îfade kerd ke demê ameyoxî de eke tesîsê sporî yê qezayan biqedîyê do wendekaranê taxanê dewan rê zî kursanê sporê hamnanî organîze bikê.
