Kurdîstan de kulturê paleyî zaf nêro kerdene zî dewa Melî ya Şirnexî de no kultur hema zî dewam keno.
Her ke teknolojî aver şono, hacetê seba çinayîşî yenê şuxulnayene zî bedilîyenê û cayanê de ke tede çînayîş yeno kerdene, kulturê paleyî zî hêdî hêdî vîndî beno. La kêm cayan de bo zî kulturê paleyî û hetkarî dewam keno. Her çend sebebê dewamê nê kulturî şertê cograafya bibê zî kesê ke paleyî kenê, bi vatişê deyîran nê kulturî ra keyf gênê.
Şaristanokê dewa Melî de no kulturê paleyî kêm bîya la hema zî dewam keno. Şaristanokî de hema vaje heme welatijî merdimê yewbînan ê û cayê ke makîneyê çînayîşî nêeşkenê şêrê mîyanê zevîyan, ê pîya şonê paleyî û hetkarîya yewbînan kenê.
‘Her roje ma şonê hetkarîya keyeyêk kenê’
Xalid Sîdar welatijanê dewa Melî ra yew o ke ameyo paleyî dîyar kerd ke demanê verênan de traktoran zevî hewanênayêne û vat: “O wext bi ga û hêstiran ma xele çînayêne. Tu kes tena bi sereyê xo nêşîyêne erdê xo. Ma dore kerdêne û her roje ma şîyêne hetkarîya keyeyêkî kerdêne. Xora demo ke hetkarî çin ba, karê çînayîşî zî nêqedîyeno.”
‘Demanê verênan de paleyî sey şayî bîyêne’
Sîdarî da zanayene ke kulturê paleyî vîndî bîyo û qiseykerdişê xo wina qedêna: “Demo ke ma şîyêne paleyî, ma sey şayîyêk şîyêne. Deyîrê paleyî ameyêne vatene. Ma nika ameyê erdê datê mi. O tena ciwîyeno û şono heywananê xo ver. O semedî r ama kom bîyê û ma vat ma şêrê hetkarîya ey. Nika no kultur vîndî bîyo û ciwanî karê çînayîşî nêzanê.”
Çînayîşê xeleyî ra pey dora patosî ya û demê patosî zî dewijê şaristanokî hetkarîya yewbînan kenê û karanê xo yê çînayîşî qedênenê.
