Namdaranê Dersimî ra Mehemed o Derg şî heqîya xo. Mehemed o Derg Mezra Dewa Korkese (Batman) Hopike da vizêri dîya hard. Nasanê î ajansê ma rê qisey kerd.
Namdaranê Dersimî ra Mehmet Yildiz (Mehemed o Derg) 27ê Hezîrane de şî heqîya xo. O herdê Dêrsimî, çand û kultirê Dêrsimî de yew kesêko muhîm bî. Mehemedo Derg zafêrî bî kayê “Varvara Silêmanû” yeno naskerdene. Gaxanan, Hewtemal û Newrozan de zê sembolê ca girewtêne. Mehemedî be xo Dêrsimî ra, şar û kultirê Dêrsimî ra heskerdêne, şarê Dêrsimî zî î ra heskerdêne.
Mehemed o Derg Mezra Dewa Korkese (Batman) Hopike da vizêri dîya hard. Cinazeyê î Cemevîyê Tuncelîye de ame rayekerdene. DEM Partîye û DBPî ra sîyasetmedarî, temsîlkarê Komeleyanê demokratîkan û şarê Dêrsimî cinaze de ca girewt. Heval û hogiranê Mehemedê dergî cinazeyê î de zî teyna nêverda û berd kerd virana herdê dewrêşî. Nê hevalanê î ra Alî Ekber Berktaş û namdar Velî Yildizî ajansê ma rê qisey kerd.
‘Mordemê nîyanênî qolay qolay nênê dinya’
Alî Ekber Berktaşî seba Mehemedê Dergî wina va: “Ûzûn Memed mutewazî bî, kamilî de kamil bî, gencî de genc bî, domanî de doman bî. Ewro roje roja îya, gerekê ma î rind raye bikime. Ma mordemanê xo rê rind wayîrîye nêkenîme. Ûzûn Memed Kurêşij bî, î bajîyê (baskê) xo ke dardêne we ti vatêne qertal bî. Yanê bi derya. Ci rê berbo, çike mordemê nîyanênî qolay qolay nênê dinya. Peyser nênê.”
‘Wertê gul û nurî de bo, ma ci ra rajîyî me’
Hevalê Mehemed ê Dergî namdar Velî Yildizî zî hîsê xo wina dîyar kerdî: “Na Dêrsim de herkes naskeno. Pîlî de pîl bî, qicî de qic bî. Kamî kotîde venga ci dêne nêvatêne nê. Çike waştêne kultirê ma, folklorê ma herkes bimiso. Domanan ra xortan ra kî vatêne, gegenan unîversite de kî misnêne xortan. Heq zano ke ma ra gore zaf rind bî. Wertê gul û nurî de bo. Hem îtîqatê xo ramitêne hem ziwanê xo ser vinertêne. Hem kamî kotîde venga ci bidêne seba xatirê kultirê xo nê vatêne nê. Wertê gul û nûrî de bo. Ma ci ra rajîyî me heq kî î ra rajî bo.”
