Komela Paştî, Kultur û Perwerdeyî ya Şêx Seîdî qezaya Sûr ya Amedî de bi munasebetê serrgêra vîrardişê Şêx Seîdî komxebata bi nameyê ‘Kurdîstan de 100 serrî: Heqîqet Edalet û Aştî’ organîze kerd.
Komela Paştî, Kultur û Perwerdeyî ya Şêx Seîdî Seîdî qezaya Sûr ya Amedî de bi munasebetê serrgêra vîrardişê Şêx Seîdî komxebata bi nameyê ‘Kurdîstan de 100 serrî: Heqîqet Edalet û Aştî’ organîze kerd. Seserrîya dardekerdişê Şêx Seîd û embazanê ey de bi pêşengîya Komela Paştî, Kultur û Perwerdeyî ya Şêx Seîdî otêlêka qezaya Sûrî ya Amedî de komxebatêk ameye organîzekerdene.
Hemsereka Partîya Herêmanê Demokratîk (DBP) Çîgdem Kiliçgun Uçar, Hemsereka Rêxistina DEM Partî ya Amedî Gulşen Ozer, parlamenterê DEM Partî, Hemşaredarê Amedî yê Şaristanê Girdî Dogan Hatun û endamê xeylê sazgeh û rêxistinanê sîvîlan beşdarê komxebate bîyê.
‘Şêx Seîdî vera asîmîlasyonî serewedarna’
Serekê Komela Şêx Seîdî Kasim Firat qiseykerdişê destpêkê kerd. Kasim Firat xêrameyîşê heme mêmanan kerd û vat: “Se serrî ra ver bi pêşengtîya Şêx Seîdî serewedaritişî dest pêkerd. Şêx Seîd û embazê ey însanê zanayeyî bîyê. Înan vera înkar, asîmîlasyon û zilmî sere wedarna. Serhed, Amed û xeylê cayanê bînan de kombîyayîşî kerdê. Amancê înan o bi ke şarî birêxistin bikerê û dima hukmatê Anqara reyde dewaya heqanê şarê kurdî bikerê. La çi heyf ke 13ê sibata 1924î de encamê provakasyonêkî de çend hebî leşkerî yenê kiştene û verê ke xo birêxistin bikerê, serewedaritiş dest pêkeno.”
Proseso newe de kurdî
Kasim Firat da zanayene ke ewro prosesêko muhîm welat de dest pêkerdo û vat: “Lazim o ke nê prosesî de şarê kurdî yewîya xo xurt bikero. Ganî her kes paştî bido nê prosesî.”
Komxebate qiseykerdişê Kasim Firatî ra pey çapemenî rê girewte dewam kerd.
