Ekolojîst Melîs Tantan da zanayene ke mabênê awankerdişê aştî û qedênayîşê qirkerdişê ekolojîkî de têkilîyêk est a û vat: “Qirkerdiş bi aştî û komelo demokratîk eşkeno biqedîyo. Ma do seba aştî heme çî bikerê.”
Bi serran o qadanî ke şerê taybet tede yeno kerdene, înan ra yew xoza ya. Xoza bi talan û qirkerdişî reyde yena rî bi rî. Kurdîstan de xeylê şaristanan de qirkerdişê xozayî dewam keno. Seba qedênayîşê qirkerdişô ekolojîk, şerto ewilin aştî ya. Ekolojîst Melîs Tantan derheqê awankerdişê aştî û bedilîyayîşanê qada ekolojîkî de ajnsê JINNEWS’î rê qisey kerd.
‘Ganî aştî seba xoza zî biba’
Melîs Tantan da zanayene ke ê sey kesî ke têkoşînê ekolojîkî danê, pêvînayîşanê aştî pozîtîf vînenê û paştî danê. Melîs Tantab wina vat: “Eşkerayîyanê ewilan ra pey ekolojîstan paştî daye prosesî. Têgêrayîşo ekolojîst vizêrî ra heta ewro herre û xoza paweno. Şer qirkerdişanê ekolojîk yê pîlan ano. Nê semedî ra zî heme gamî seba qedênayîşê şerî seba xelesnayîşê xozayî zî.”
‘Aştî do vernîya qirkerdişê xozayî bigîra’
Melîs Tantan dîyar kerd ke awe sey hacetêka şerî ameya şuxulnayene û îfade kerd ke awankerdişê aştî do vernîya xespkerdiş û qirkerdişê xozayî bigîroç Melîs Tantan wina qisey kerd: “Awe hem yena xespkerdiş hem zî yena leminkerdiş. Awe biherîya beno ke xo pak bikera. Ganî çimeyê awan bêrê pawitene. Ko û daristanî muhîm î. Derheqê prosesî de pêvînayîş dewam kenê. Gamî ke yenê eştene ganî nê hetî ra zî bêrê eştene. Seba caardişê aştî ganî ewil projeyê enerjî û madenî yê Kurdîstanî bêrê vindertene. Riha de projeyê GES’î est o. Awbendê Cizîr, awbendê Farqîn û awbendê newe yê Çemê Dîjleyî yenê awankerdene.Ganî madenê zêr ê Îlîçî yê Firatî bêro girewtene. Seba awankerdişê komelê demokratîkî ganî ma wayîrê awa xo vejîyê.”
Hemkarîya têkoşînê ekolojî û aştî
Melîs Tantan muhîmîya hemkarîya têkoşînê ekolojî û aştî û hemkarîya qada di têkoşînan ser o vinderte û vat: “Şer qirkerdişo tewr pîl o. Cografyaya Mezopotamyayî nimûneya tewr baş a. Têkoşînê ekolojîyî eynî wextî de pawitişê cuye yo, sey têkoşînê aştî. Yê ke vera merdiman şer danê destpêkerdene, vera xozayî zî danê destpêkerdene. Bêyî aştî xoza nêxelesîyena. Demo ke xoza azad biba do aştî bêra ca. Qirkerdişo ekolojîk encax bi afirnayîşê komelo demokratîk eşkeno vindero.”
