DBP’î serrgêra Qirkerdişê 5ê Hezîrane ser o hesabê xo yê X’î de mesajo nuştekî pare kerd. DBP’î eşkera kerd ke: “Ma canê xo yê ke 5ê Hezîrane de vîndî kerdî, bi hezkerdiş û hesrete anê xo vîrî, wado ke ma dayo înan dubare kene; Ma do nê erdan rê aştîye, edalet û têduştîye qetî bîyarê.”
Serra 2015’î mîtîngê Amedî yê HDP’î de, di bombeyi teqîyayî. Nê hêrişan de 5 welatijî cuya xo dayî û 400 welatijî birîndar bîyê. Nê hêriş hema zî nîno vîrakerdiş. Serrgêra Qirkerdişê 5ê Hezîrane ser o Partîya Herêmanê Demokratîkan (DBP) hesabê xo yê X’î de mesajo nuştekî pare kerd.
Mesajê DBP’î wina yo:
“Ma Qetlîyamê 5ê Hezîrane Xo Vîr Ra Nêkerd!
5ê hezîrana 2015î de Raşteyê Îstasyonî yê Amedî de mîtîngo ke bi destê HDP’yî ame serûberkerdene de, hêrişo ke vera waştişê şarî yê aştîye û demokrasî virazîya ra pey 10 serrî vîyartî. Bombayê ke eynî dem ameyî teqnayene 5 canê ma girewtî, bi seyan hemwelatîyê ma dirbetin bîyî. A roje uca de têna bedenî nê, hêvîya cuya hempare û wayûbirayîya şaran ameyî hedefgirewtene.
Kerdoxê nê qetlîyamî Orhan Gonder û plankerê hêrişî netîceya muhakemekerdişê bi serran de ceza girewte. Labelê rixmo ke îxbarê ke rayapêroyî rê akerde yê, qeydê otêle û zanayîşê îstîxbaratî eşkera yê derheqê selahîyetdaranê pêroyî yê ke wezîfeyê xo nêyanê ca de çîyêk nêame kerdene. Edalet reyna kêm o; hukmî reyna nêdîyayîşê raştîyan weçînit.
Ma şahidê nê pergalê tarî yê. No demo ke hukmî bêterefîya xo vîndî kerda, bêcezayîye qayde bîya de ma qetlîyamî xo vîr ra nêkenê û do xo vîr ra mekerê. Her hêriş seba ma tersnayîş, hemilnayîş û texelnayîşî ame plankerdene. Labelê ma her hêriş de yewîye, piştîdayîş û rika xo pîl kerdî.
Ma canê xo yê ke 5ê Hezîrane de vîndî kerdî, bi hezkerdiş û hesrete anê xo vîrî, wado ke ma dayo înan dubare kenê: Ma do nê erdan rê aştîye, edalet û têduştîye qetî bîyarê.”
