DEM Partî derheqê pêvînayîşê xo yê MHP’yî reyde eşkerayî daye û dîyar kerd ke ganî babeta çareserîya meseleyê kurdî meclîs de bêro qiseykerdene.
Hemserekê Partîya Têduştî û Demokrasîyî ya Şaran (DEM Partî) Tulay Hatîmogullari û Tuncer Bakirhan meclîs de Serekê Pêroyî yê Partîya Hereketo Netewperest (MHP) Devlet Bahçelî reyde pêvînayîş kerd.
DEM Partî derheqê pêvînayîşî de eşkerayîyêka nuştekî weşanaye.
Çi ame qiseykerdene?
Eşkerayî de ame vatene ke pêvînayîşî de behsê hedîseyanê Tirkîya û herême ame kerdene û nê çîyî ameyê parekerdene: “Kombîyayîşo ke tede dayîûgirewtişo hîra ê amancan est bi, atmosferêko xeylê awankerî de ame kerdene. Kombîyayîşî de hedîseyanê dimayê vengdayîşê Aştî û Komelo Demokratîk, prosesê demokratîkbîyayîşê Tirkîya, pêvînayîşê Heyetê Îmraliyî yo DEM Partî Birêz Abdullah Ocalanî reyde û qerarê kongreya 12ê gulane de ke hetê PKK’yî ra ameyê eşkerakerdene zî ameyê qiseykerdene. Gamî ke ganî seba averşîyayîşê prosesî bêrê eştene, rolê parlamentoyî bikewo dewre, pakêta dadgerîye ya newa, komîsyono ke yeno zaneyene ke do meclîs de bêro awankerdene û babetanê qanûno bingeyîn ser o nîqaşî ameyê kerdene. Bale ame antene ke mîyanê Meclîsê Pil ê Neteweyî yê Tirkîya de goreyî ke Bahçelî waşt, komîsyonêko bi temamê qanûnî bêro awankerdene û bi nê hewayî yeno waştene ke partîyê sîyasî nê prosesî de beşdarbîyayîşêko aktîf bîyaro ca û no wayîrê muhîmîyêka krîtîk o.”
