Eliyê Bilûrvan (Eli Şimşaljen) şaristanê Sineyê Rojhelatê Kurdistanî de yew vengweş û bilûrvanêko zaf erjîyaye bî. Labelê karo sereke yê keyeyê inan qesabkarî bi. Pîyê Ebasî hetê birayê xo ra dikanê qesabkarî de kişiyeno, uca ra tepîya ciwiyayişê Ebasî zaf zor û biters beno. Ebas hema 3 serre bî, hetê dayika xo ra xoverdayîşê mamayê xo ra xover xelesîyeno.
Dayika Ebasî piştgirî dana ey û o beno Ebas Kemendî ke Kurdî pê şanaz ê. Ebas Kemendî yew qiseykerdişê xo de vano: “Ez qandê coy gird nêbîyaya ke tola pîyê xo bigira, ez ameya çewisnayene, zilm ame mi ser o û qerar bi ke ez sax nêmana, labelê ez menda.”
Kemendî hina doman bi, dayika xo reyde şono hemamê gird ê şaristanê Sineyî. Uca de asayişê cinîyanê hemamî de beno tabloyo verên û lewheyê ser o nexş keno. Uca de hunerê Kemendîyî aseno. Kemendî des û çar serrîya xo de dest bi wendiş û nuştişî keno, des û panc serrîya xo de şîîra xo ya verêne nuseno. Ressam, şîîr û çimey benê esasê hunermendbîyayîşê ey. Hina des û hewt serre bi, çimeyê ‘Şewbû û Heme Şiwan’ nuseno. Des û heşt serrîya xo de pêşbazî de xelata çimeyo tewr holî gêno.
Merkezê Girdi: Radyoyê Sine
Kemendî keye de resimî viraştêne û şîîrî nuştêne. Teber de zi şîyêne Radyoyê Sine û uca de dest bi karê dublajî keno. Radyoyê Sine beno merkezê girdi qandê asayişê berheman û hunerê ey. Des û heşt serrîys xo de Radyoyê Sine de di dewan qeyd keno. Labelê qandê ke ey rê nê asayîşê holî de nîyo, înan vila nêkeno. Badê coy Şehên Talebanî ke cirana xo bi, yew deyîra verêne bi nameyê ‘Sebrî’ Radyoyê Sine de qeyd keno. Na deyîre çar perçeyanê Kurdistanî de veng vejena û heta nika zi fekê şarî de yena vatene.
Kesayetîya zafhetên
22ê gulana 2014î de Hunermendo Kurdî Ebas Kemendî qandê laşê ganwerî yê gonî şaristanê Sineyê Rojhelatê Kurdîstanî de wefat keno. Goristanê Asawleya Sineyî de defin beno. Ebas Kemendî vist serran de Kurdîstan de bi dewan û muzikanê xo yeno şinasnayene. Hîrê albumî bi nameyê ‘Hewraman, Pirşend û Gelawêj’ Koma Muzîkî ya Kamkaran de qeyd keno. Albumê ey ê peyênî zi ‘Kîjî Ladê’ bi.
Ebas Kemendî 97 tabloyê resimî viraştê, 130 şîîr û 6 romanî nuştê. 30 filmanê kilm û dergan de 150 deyîrê ey est ê. Çimeyê nuştox û romannuştoxan bi. Eynî wextî de kayker, direktor, sînemaker û senarîstê tîyatro û dramayan bi. Reyna pêşkêşkarîya programanê radyo û televizyonî zi kerdêne.
Vist û di serran de zeweciyeno û beno pîyê yew laj û di kêneyan. Kemendî 22ê gulana 2014î de şeştî û di serrî de riyê nêweşîya laşê ganwerî yê gonî û vindertişê qelbî ra wefat keno. Ebas Kemendî Goristanê Asawleya Sineyê de defin beno.
