Seba ke dest dabi kitabê înan ser o vera Hakki Boltanî yo ke wayîrê Weşanxaneyê Aramî yo û xebatkarê ey Delîl Zengeralpî, bi îdiaya “propagandaya rêxistine” dewa abî.
Derheqê wayîrê Weşanxaneyê Aramî Hakki Boltan û xebatkarê ci Delîl Zengeralpî de Serdozgerîya Komare ya Amedî îdianame amade kerde û mehkemaya Cezayanê Giranan ya 4. ya Amedî zî îdianame qebul kerde.
Kitabo ke dest dabi ser o sey delîl mojna
Îdianame de kitabê ke Weşanxaneyê Aramî ra vejîyayê û fuarê kitaban yê Amedî de ke mabênê tarîxanê 30ê teşrîna peyêne û 8ê kanûne 2024î de amebi viraştene, uca dest dabi ser o, sey “delîlê sucî” mojnayî. Bi taybetî zî îdia bîye ke kitabê Hatîp Dîcleyî “Rojnivîska Berxwedana Efrînî” de “propagandayê rêxistine” ameya kerdene.
Yew paragrafo ke rîpelê 361. ê kitabî de ca gêno û tede wina yeno vatene: “Netîce de Efrîn de şer û sucê vera merdimîye ameyî kerdene. Hewna 27ê gulana 2018î ra nat bombardumanan de 259 sîvîlî, înan ra 56 cinî û 46 domanî ameyî qir kerdene û 707 sîvîlî, înan ra 104 cinî û 155 domanî zî birîndar bîyî. Bi hezaran Efrînjî bi zor cayanê xo ra ameyî vetene.” sey “propagandaya rêxistine” ame nîşandayene.
Qerarê desteserkerdişî 37 rojî ra dima ame dayene
Îdianame de yeno vatiş seba ke tedeyê aye îşaret ameybî kerdene, Mehkemeyanê Cezayanê Sulhî yê 2. 10ê çeleya 2025î de qerarê arêdayîşê heme çapanê kitabî û qerarê qedexekerdişî da.
Her wina ame vatiş ke kitabê Mahmut Abayî “Dildarê Serkeftinî”, 30ê teşrîna peyêne ya 2024î de ameyo desteserkerdene. Nêê kitaban ser o, vera Boltan û Zengeralpî de bi îdiaya “propagandaya rêxistine” doz abîye. Roniştişê dozî 9ê teşrîna peyêne ya 2025î de do bêro kerdiş.
