Hemserekê Pêroyî yê DEM Partî Tuncer Bakirhan îfade kerd ke nê prosesî de di rayîrî vernîya Tirkîya de yê û vat: “Yan do rayîrê aştî weçîna û ver bi silametî şêra yan zî do şerî weçîna û mîyanê kaosî de vîndî biba.
Endamê Meclîsî yê DEM Partî seba erjnayîşê hedîseyanê rojevî ameyê têhet. Hemserekê Pêroyî yê DEM Partî Tuncer Bakirhan kombîyayîşî ra ver eşkerayî daye. Endamê Meclîsî yê DEM Partî Hemserakanê Pêroyî Tulay Hatîmogullari û Tuncer Bakirhanî reyde kom bîyê.
‘Ê ke nêbedilîyî do vîndî bibê’
Hemserekê Pêroyî yê DEM Partî Tuncer Bakirhan ewil hedîseyanê Rojhelatê Mîyayanên û dinyayî ser o vindert û wina vat: “Hedîseyê dinya bi hewayêko şewatî dewam kenê. Dinyayêka newa û Rojhelatêko newe yeno awankerdene. Proseso ke ma tede yê, hem sîyaseto global û hem zî Rojhelato Mîyanên seba xo rotayêka newa gêrenê. Ukrayna şer ra veşena. Îsraîlî bi hêrîşanê xo Gaze de gonî rişnena. Iraq mîyanê nedîyarî de ya. Sûrîye parçe parçe bîya. Nê hedîseyî ma hemînan eleqedar kenê. Heme îtîfaqê verênî yew bi yew şonê û îtîfaqê neweyî yenê awankerdene. Rojhelato Mîyanên de çîyo ke nêbedilîyo do vîndî bikero.
PKK’yî qeraro tarîxî da
Tuncer Bakirhanî bale ant muhîmîya qerarê PKK’yî ser o û wina vat: “Qerarê bedilnayîşo tarîxî yê PKK’yî wendişê nê vayê globalî yo. Tirkîya zî hewl dana nê prosesî de rotayêk dîyar bikera. Nê prosesî de di rayîrî vernîya ma de yê. Yan do kaos dewam bikero yan zî do silametî û aramî aver şêra. Tarîxanê muhîman de di rayîrê vejîyenê vernîya netewan. Yan binkewenê yan zî serkewenê. 1ê teşrîna verêne de Bahçelî, 27ê sibata 2025î de vengdayîşo tarîxî yê Birêz Abdullah Ocalanî û kongreya PKK’yî ya 12. Gamê zaf muhîm î. Nê prosesî de ma heme wayîrê berpirsîyarîyan ê.”
Yan ma do îttîfaqê aştî awan bikerê yan zî ma do vîndî bibê
Tuncer Bakirhanî wina domna: “Ma nika weçînitişêko tarîxî reyde rî bi rî yê. Yan ma do têkilîyanê kurd û tirkan bingeyêko rast ser o awan bikerê yan zî ma do binê awa senaryoya Rojhelato Mîyayênî de vîndî bibê û şêrê. Proseso ke 22ê teşrîna verêne de bi pêvînayîşî dest pêkerd û bi mesajê Birêz Ocalanî yê 27ê sibate de resa lutkeyî, rayîr û berê silametî akerd. Eke ma bieşkê nê berî ra vîyarê, hem Tirkîya û hem zî Rojhelato Mîyanên do nefesêko pîl bigîro. PKK’yî 12ê gulane de qerarêko tarîxî da. No qerar ‘Wa çekî vinderê û sîyaset qisey bikero’ bi. Ewro ma bi saya nê qerarî ma hîna zaf nêzdîyê nê qerarî yê. Ganî ma nê qerarî ra pey paştîyêka pîle bidê aştî. No qerar do rayîrê vernîya yewîya kurd û tirkan akero. Komelo Demokraîtîkî de cayê çekan çin o. Cayo ke tede demokrasî est bo, ganî çekî bêrê bêvengkerdene. Birêz Ocalan wazeno huqûq û qanûnan ser o na wa û birayî bêra awankerdene. Birêz Ocalan behsê Huqûqo Têduşt keno. Aştî û huqûqê yewîya şaran ganî meclîs de bêro teqezkerdene. Prosesê 2013 û 20253î de meclîs beşdarê prosesî nêame kerdene, na kemaneya tewr pîl a. Seba ke ma meclîsî beşdarê prosesî bikerê, ma do reyna partîyanê sîyasîyan reyde pêvînayîşan bikerê. Nê prosesî de do heme çî bibedilîyo. Ganî ma prosesê aştî bilez bi encam bikê.”
