Keyeyanê Alî Haydar Kaytan û Riza Altunî spasîya kesanî ke beşdarê tezîye, vîrardiş û çalakîyan bîyê kerd û vat: “Azadîye reyde tacîdarkedişê nê rayîrî ke înan dayo destpêkerdene, deynê ma yo.”
PKK’yî kongreya xo ya 12. de ke mabênê tarîxanê 5-7ê gulane de eşkera kerd ke di kadroyê pêşeng ê partîyî Alî Haydar Kaytan û Riza Altun şîyê heqîya xo. Eşkerayî ra pey xeylê şaristananê vakurê Kurdîstan û Tirkîya de seba Kaytan û Altunî tezîye ameye ronayene û çalakîyê vîraardişê ameyê organîzekerdene.
Keyeyanê Kaytan û Altunî bi mesajêk spasîya kesanî ke beşdarê tezîye, vîrardiş û çalakîyan bîyê, kerd. Goreyê xebera ANF’yî mesajê keyeyan wina yo:
“Xebera şehadetê Alî Haydar Kaytan û Riza Altunî tena semedê ma keyeyan nê semedê heme kurdan ke estbîyayîş û azadîya xo wazenê, vîndîkerdişo pîl bi. Çike înan herinda keyeyî de welatê xo vîjna, bira, lajî ra zafêr, bîyî hemra. Coka dejê ma kolektîf o. Ma sey keyeyê înan nameyê înan bi sereberzî û bi rûmet kirişenê.
Înan ra ma rê mîrasêko xurt û erjîyaye mend. Bawerîya seba ameyoxêko azad ê şarê Kurdîstan û Rojhelatê Mîyanên û heme kesî ke vera sîstemê têkoşîn danê. Seba ke na bawerî bîyarê ca, îradeyêko xurt afirna. Heme keyeyo ke da berê ci ro, heme cayo ke tasêk awe tede şimite, heme wareyo ke ci rê bîyê mêman, ucayî rê tesîr kerd, herinda xo verdaye, herinda ke keyeyanê ma de verdaya, aye ra vêşêr. Nê semedî ra heme hetanê Kurdîstanî şar ewladê xo verar kerdê. Qamişlo ra heta Silêmanî, Amedî ra heta Torontoyî û heta Kolnî bi des hezaran kurdî wayîrê pêşenganê xo vejîyayî. Vera şarê ma qala ke ma vajê çîn a. Ma reyna vanî ke deynê milê ma yo ke ma rayraşîyayîşê înan bi serkewtişî tacîdar bikerê.
Ma sere de keyeyanê şehîdan, kedkaranê têgêrayîşê azadîye û her keso ke rayîrê înan de rayra şino û ma rê beno nefes, ma spas kenê. Ma sey keye û hemrayanê înan soz danê ke ma do têkoşînê înan bidê domnayene. Ma do sozdarê Rayber Apo, şehîd û erjanê xo yê azadîye bibê û bi nê hewa rayra şîrê.
Şehid Namirin!”
