Programê vîrardişê her di pêşengehanê PKK’yî ke vizêr Dêrsim de ame kerdene, bi hezaran kesî beşdar bîyê û înan dîyar kerd ke ma ganî înan rê wayîr vêjîyê û wina vat: “Ê tacê serê şarê kurdî yê. Her dem do zerrîya ma de biciwîyê.”
Partîya Karkeranê Kurdîstanî (PKK) encamê kongreya xo ya 12. eşkera kerdbi û dîyar kerdbi ke xo fesih kerdo. Reyna kongre de şehadetê awankerdox û pêşengehanê PKK’yî Alî Haydar Kaytan û Riza Altunî zî amebi dîyarkerdene. Kongre dîyarîya înan ameye kerdene. Eşkerakerdişê şehadetê Alî Haydar Kaytan û Riza Altunî ra pey xeylê şaristananê vakurê Kurdîstan û Tirkîya de rojanê dîyarkerdeyan de tezîye yena ronayene. Vizêr zî Dêrsim de programê vîrardişî ame kerdene. Des hezaran merdimî seba vîrardişê pêşeng û awankerdoxanê PKK’yî Riza Altun û Alî Haydar Kaytanî şaristanane cîya bi cîyayan ra ameyî Dêrsim. Êyê ke Amed û Mûş û şaristananê dormeyî ra ameyî, Meydanê Sey (Seyîd) Riza de kom bîyê.
Kesî ke beşdarê programî bîyê ajansê ma rê qisey kerd û hisê xo îfade kerdî.
‘Ma înan rê wayîr vejîme’
Welatij Ekrem Taştekîn dîyar kerd ke ê seba xatirê şehîdanê xo ameyê tîya û wina vano: “Eyr rocê Dêrsim a, di heb deger Dêrsim destpêkê hereketê kirdon ra heta eyr vernî de zaf emeg da. Eyr ma zî qey xatirê şehadetê înan ma semedê miletê xo mey pêser. Ma wazenî ke no însanê ma bêwayîr nêbî, wa wayîr înan bibê. Însanê ma yê, mayê ma yê, pîyê ma yê, birayê ma yê, embazê ma yo. Ê çiray nêyenê xo vîr ra kerdiş.”
‘Emanetê înû rê wayîr vejîme’
Hemşaredarê Dêrsimî ke herinda ci de qeyûm ame eştene qisey kerd û dîyar kerd ke hardê dewrêşî de seba embazanê xo Alî Haydar Kaytan û Riza Altunî ameyê têhet û wina dewam kerd: “Ewro 17 gulanê, îta ra koyê dersîm ra, herdeno xo ra, herde dewrêş ra pêrûne rê sîlamane xo rusnemê. Înune kî na asma gulane dê şî, rayê heqî, emanetê înû rê wayîr vejîme. Ewro pancas serî ke seva mîletê kirmancî mîletê kizilbaşî emeg danê, emeg dayo ewro herdê Dêrsimî de, herdê dewrêşî de ra ma hevalê ma Alî Haydar Kaytanî ya, hevalê ma Riza Altun ra no mîlet amo ju ca. Ewro îta de pîrê ma murşîde ma duwayo kenê. Ewro loqma vila kenê. Çar rozî yo ke sarê Dêrsîm hazirlîya xo keno.
‘Mîletê koyê Dêrsimî kî rindîye wazeno’
Cevdet Konak bale ant astengî û hêrişan ke hemverê şaro ke wazeno bêro meydan û beşdarê programî bibo. Konak dîyar kerd ke şarê Dêrsimî rindîye wazeno, bi nê kerdişanê dewlete rindîye nêbena û wina vat: “Nika mîlletê ma îta de amo pêser her ca polîs gureto. Mîletê ma rao olaxu de mendo, nêverdanê bêrî. Çayê sima kî raştîyê wazenî rindîye wazenî mîletê koyê Dêrsimî kî rindîye wazeno. Çand ser ke na hukumet dest ra zaf heşîrîye dî. Zaf gonîya ma rişîyaye. Ma herdeno xo ra bîme. Ma jiyar û dîyarunê xo ra kutîme dûrî. Berê êdî naye mekerî. Berê zey bira ju ca de vinderîme, zey bira jubînî ra wayîr vejîme. Na asmê de çiqa sîyasetçî est o vanê rindîyê bibo. Rindîyê na bîçîm nêbena. Rindîyê na feqîr fuqara rê na ezîyetê kerdene nêbena. Ma îta de ewro hevalanê xo Alî Haydar Kaytan be Riza Altunîya îta de înu ra wayîr vejîme. Serê ma ser hurînê îno est a. Îno cao ke kîlîtê koê Dêrsimî, kilîtê koê Kurdîstanî de caverdo, ê kîlît îta de sarê kirmanc înu rê wayîren keno. Ma hata san îta de a ke destê berîme yena xizmetê ma ame hurend.”
‘Ê tacê serê şarê kurdî yê’
Îmran Kilinç ke Depe ra seba vîrardişê her di şehîdanê PKK’yî ameyo Dêrsim dîyar kerd ke ê tacê serê şarê kurdî yê û wina domna: “ Ma dep ra yemê Dêrsim. Ma sevetenê şehîde xo ameymê, Alî Haydar Kaytan û Rîza Altun. Embazê hareketê partîya mao. Destpêkî ra heta peynîya emrê xo, emrê xo da xebatanê kurd. Zerê hereketê kurdî de karê sîyasî xebat kerd. Ez înan zerrî ra ana xo vîr. Ê tacê sereyê şarê kurdî yê. Her dem do zerrîya ma de biciwîyê.
‘Ma zaf dirbetinîme, wa haştî bêro’
Welatije Gûltaze Yeleser qiseykerdişê xo de bale ant dejî ke antê ser o û dîyar kerd ke ê edî aştî wazenê û wina vat: “Ma rîyê Alî Haydarî ra amay. Rîyê Alî Rîza Altu ra amêy. Haştîyê wazemê. Ma xeyle dêz dî. Ma zafî dîrbetînî mê. Haştîyê bêro, haştîyê rayê xo bî vîno, gencê ma memirê. Bervayîş me vo, betvayîş ra çîmê mae bîyo korî, narê tepa haştîya bero. Êdî fekemarê towa nîno ke vajîmê. Zerê ma let pîrozîna, pêro zan û zîyan o, far ma deqeno. Ma zaf dez dî.”
