Hemsereka KURDÎGEH’î Arîfe Arslan derheqê muhîmîya kurdkî de qisey kerd û va: “Statuyê ziwan û perwerdeyî bi ziwanê dayîke semedê ma esas o. Seba ke ziwanê ma bibo ziwanê perwerdeyî, ma xover danê.”
15ê Gulane Roşanê Ziwanê Kurdkî bi waştişê ‘Semedê kurdî statu, bi ziwanê dayîke perwerde’ yeno pîrozkerdiş û waştişo wa vernîya perwerdeyî bi ziwanê kurdî bêro akerdiş û statuyê kurdî bêro naskerdiş, xurt beno. Hemsereka Komela Kultur û Ziwanê Kurdî (KURDÎGEH) Arîfe Arslan derheqê muhîmîya roje de qisey kerd.
‘Semedo ke bibo ziwanê fermî ma xo ver danê’
Arîfe Arslan dîyar kerd ke 15’ê Gulana 1932ine de Mîr Celadet Elî Berdirxan bi tîpê latînî kovara Hawarî vet û no sey Roşanê Ziwanê Kurdkî yeno pîrozkerdiş. Arîfe Arslan wina va: “A roje ra ya kurdkî bi tîpê latînî yena nuştiş. Çîyo ke netewan dano nasnayîş ziwan o. Nê semedî ra ziwan ma rê muhîm o. Ziwanê ma perwerde de nîno şuxilnayîş. Nê semedî ra binê tehluke de yo. Semedê ma esas statuyê ziwanî û perwerdeyê bi ziwan o. Ma semedê nê têkoşîn kenê. Ganî tutê ma bi ziwanê xo perwerde bigîrê.”
‘Modernbîyayîş bi ziwanê xo qisey kerdiş o’
Arîfe Arslan dewam de wina va: “Qedexekerdişê ziwanê şarêk yeno manaya o şar werte ra bêro wedaritiş. Şar bi ziwanê xo yeno nasnayîş. Bi serran o hemverê ziwanê ma de hêrişî est ê. Bi hawayêko sîstematîk hêriş kenê. Wazenê çin bikerê. Nê semedî ra ganî ma keyeyê xo dest pêbikerê û her wareyî de bi ziwanê xo qisey bikerê. Ziwanê ma dewlemend o, modern û bedew o. Modernbîyayîş bi ziwanê xo qiseykerdiş o.”
‘Ziwan heqo tewr esas o’
Arîfe Aslan wina qedêna: “Bi ziwanê xo qiseykerdiş, heqo tewr esas o. Şar bi ziwanê xo yeno nasnayîş. Bi ziwanê xo est ê. Ganî ma wayîrê ziwanê xo vejîyê, qisey bikerê, binusê û xurt bikerê. Semedê ziwanê kurdî bibo ziwanê fermî ganî her wareyî de têkoşîn bêro kerdiş.”
