Hemserekê DBP’yî yê Giyadînê yê Agirî Nezîr Budak, sebebê qiseykerdîşê ey yê Newroza Giyadînî de ke Google de şaş ameybî açarnayîşî, ame destbendkerdene. Polîsan çekuya “Quntar” sey “Komutan” açarna tirkî û Nezîr Budak destbend kerd û derheqê ey de doze akerde. Nezîr Budak dima ke serbest bi, vat: “No qewimîyayîş hêrişêk vera ziwanê kurdkî yo.”
Astengîyê vera ziwanê kurdkî her tim rojdem de yê. 15ê Gulane de, Roşanê Ziwanê Kurdkî de zî astengî est ê. Ziwanê kurdkî yeno qedexekerdene. Kesê ke bi kurdkî qisey kenê yenê tepiştene. Qezaya Giyadînî ya Agirî de 15ê Adare de Newroze ame pîrozkerdene.
Hemserekê Partîya Herêmanê Demokratîkan (DBP) Nezîr Budak Newroze de pêşkêşwanî kerdbî. Nezîr Budak qiseykerdîşê xo de vatibî “Quntarê Gilîdaxî ra hezar silav”. Dima pîrozkerdîşê Newroze Nezîr Budak ame destbendkerdene. Polîsan qiseykerdîşê Nezîr Budak Google de kurdkî ra açarna Tirkî ra û kerde sebebê destbendkerdîşî. Polîsan îdia kerd ke ey qiseykerdîşê xo de vat “Silav ji Fermandarê Gerila yê Çiyayê Agirî re silav” û waşt ke bêro tepiştene. Serê nê açarnayîşê şaşî ra, Nezîr Budak ame destbendkerdene û dozgerî serbest veradîya. Dima serbestveradayîşê dozgerî, derheqê ey de dava akerde. Roniştişê dava do 20ê Gulane de bêro dîyene.
Hevserekê DBP’yî yê Giyadînî Nezîr Budak derheqê destbendkerdîş û davakerdîşî ey de ajansê ma rê qise kerd.
‘Bi açarnayîşê şaşî erşawitî hepisxaneyî’
Nezîr Budakî dîyar kerd ke ey Newroze de pêşkêşwanî kerdo û va: “Ez Hemserekê DBP’yî yê Giyadînî ya. Ma îsal Giyadîn de Newroze bi coş pîroz kerd. Ez zî Newroze de pêşkêşwan bîya. Mi qiseykerdîşêk kerd. Mi qiseykerdîşê xo de va; ‘Quntarê Gilîdaxî ra hezar silav’. Dima ke Newroz qedîya şewe polîsan eşt keyeyî ser û ez destbend kerd. Ez berdî qereqolî. Vatî ‘Ma qiseykerdîşê to Google de açarna û to va; ‘Silav ji Fermandarê Gerila re’ û to vat; ‘Komutan”. Mi înan rê va mi vato; ‘quntar’ şima vanê to vato; ‘Komutan’ labelê reyna ameyî serê mi û vatî to vato; ‘komutan’ ma zanê komutan kam o. Google de qiseykerdîşê mi açarnayî û mi destbend kerdî. Mi înan rê va; no açarnayîş xirab o labelê reyna zî ez destbend kerd. No hêrişêk serê ziwanê ma yo.”
’20ê Gulane de dawa mi est a’
Nezîr Budakî da zanayene ke ey serbest veradayîyo labelê derheqê ey de dawa akerde û vat: “Ez rojêk destbende menda. Dima ez berdî mehkemeyî. Uca dadgerî reyna mi rê va; to vato; ‘Komutan’. Mi uca de reyna cewab da. Dadgerî mi rê va; to çira deqîqeyêk rêz girewt. Rêzgirewtişî sey suc name kerd. Mi o zî qebul nêkerd. Ez serbest veradîyaya labelê derheqê mi de dawa akerde. Roniştişê dawa mi 20ê Gulane de yo.”
