Avûkatanê Buroyê Hiqûqî yê Seserrî seba ke muwekîlê xo Rayberê Şarê Kurdî Abdullah Ocalanî reyde pêvînayîş bikerê, muracatê Serdozgerîya Komare û Mudirîyê Hepisxaneyê Îmraliyî kerd.
Avûkatanê seba vînayîşê Rayberê Şarê Kurdî Abdullah Ocalanî ke Hepisxaneyê Îmraliyî de şertanê giran û tecrîdî de yeno girewtene, muracatêko newe kerd. Avûkatanê Bûroyê Hiqûqî yê Seserrî ra Îbrahîm Bîlmez, Cengîz Yureklî, Sûzan Akîpa û Emran Emekçî semedê pêvînayîşê bi Rayberê Şarê Kurdî Abdullah Ocalanî muracatê Serdozgerîya Komare ya Bursayî û Mudirîya Hepisxaneyî Îmraliyî kerd. Heto bîn ra avûkatan semedê pêvînayîşê Omer Hayrî Konar, Hamîlî Yildirim û Veysî Aktaşî muracat kerd.
Avûkatê Buroyê Hiqûqî yê Seserrî Ozgur Faîk Erol 27ê sibate de Îmrali de Abdullah Ocalan, Omer Hayrî Konar, Hamîlî Yildirim û Veysî Aktaşî reyde pêvînayîş kerd. Avûkat Rêzan Sarica û Newroz Uysal Aslan tewr peyên 7ê tebaxa 2019î de şîbî Îmrali û Abdullah Ocalan reyde pêvînayîş kerdbi.
Astengkerdişê pêvînayîşan
Cewabê xeylê serdayîşanê semedê pêvînayîşê Abdullah Ocalanî, Omer Hayrî Konar, Hamîlî Yildirim û Veysî Aktaşî nêyeno dayene. Pêvînayîşî her 6 aşmî ra reyêk hetê Dadgerîya Înfazî ya Bursayî ra bi sebebê “cezaya disiplînî” yenê astengkerdiş.
Demo Rewşa Awarte de ke temmuza 2016î de ameye parekerdene, heta sibata 2018î qedexeya pêvînayîşê avûkatî ameye domnayene. Nê tarîxî ra pey waştişê avûkatan ê seba pêvînayîşî seba 6 aşman ameyê qedexekerdene. Mehkemaya Înfazî ya Bûrsayî 8ê teşrîna peyêne ya 2024î de qerarê qedexekerdişê pêvînayîşanê avûkatan ê seba Abdullah Ocalan û girewteyanê bînan ê Îmraliyî da. Derheqê sebebê qedeyexî de tu agahî nêdîyaye avûkatan.
Qeraro peyên yê qedexeyî reyde mîyanê 8 serranê peyênan de tewr kêm 15 reyan pêvînayîşê avûkatan Abdullah Ocalan rê ame qedexekerdene.
